· O pleno da Corporación local aprobou por unanimidade a adhesión ao tratado subscrito entre a Xunta, a Fegamp e as Deputacións da Coruña e Lugo.
· Juan Penabad Muras salientó que o Consistorio trasladou á Xunta a petición dun camión motobomba forestal para que o equipo de emerxencias conte cos medios necesarios para atender a toda a comarca dada a súa gran superficie forestal non noso concello e nos limítrofes”.
· Na sesión tamén se deu luz verde a un plan de medidas antifraude en relación aos procedementos financiados con fondos europeos procedentes do Mecanismo para a Recuperación e a Resiliencia.
O pleno do Concello de Ortigueira aprobou por unanimidade a adhesión do municipio ao convenio de colaboración subscrito entre a Xunta de Galicia, a Federación Galega de Municipios e Provincias (Fegamp) e as Deputacións da Coruña e Lugo para o desenvolvemento do Grupo de Emerxencias Supramunicipal (GES). Na sesión, celebrada na tarde de onte, tamén se deu luz verde por unanimidade a un plan de medidas antifraude en relación aos procedementos financiados con fondos europeos procedentes do Mecanismo para a Recuperacion e a Resiliencia ( MRR).
Así pois, o Concello aprobou a súa adhesión ao convenio para o financiamento do GES durante o 2022. Na súa intervención, o alcalde de Ortigueira, Juan Penabad Muras, manifestou que “este acordo, aínda que pode ser mellorable, é moi beneficioso para a veciñanza, xa que mantén ou funcionamento do GES, que presta un importante servizo a toda a cidadanía”.
O equipo de goberno local trasladou á Xunta a petición dun novo camión motobomba forestal para que o equipo, que atende a toda a comarca, conte cos medios necesarios para actuar con máxima eficiencia e rapidez. “Vos vehículos dous que dispoñen agora xa contan con bastantes anos de uso, polo que consideramos esencial un novo para atender a toda a comarca dada a súa gran superficie forestal”, argumentou o rexedor ortigueirés.
Pola outra banda, atendendo á normativa vixente para poder acceder ás axudas convocadas polo Estado e a Xunta, financiadas con fondos europeos do MRR, a Corporación municipal aprobou por unanimidade un plan de medidas e actuacións antifraude a seguir desde o municipio.
Axudas á transición ecolóxica
Na sesión plenaria, Primeiro Ortigueira presentou unha moción instando o grupo de goberno a convocar unha xunta de portavoces para acordar os proxectos que se presenten ás convocatorias do Ministerio de Transición Ecolóxica. Penabad Muras manifestou o seu compromiso con levar a cabo esta reunión e indicou que desde o equipo de goberno local “ xa estamos a preparar as iniciativas e, por suposto, teremos en conta as propostas que nos faga a oposición e acordaremos aquelas actuacións cuxa aprobación sexa competencia do Pleno”.
