A exposición “Medrando no rural” que puido visitarse na Galería do Concello desde o mes de novembro acaba de cederlle o sitio a unha nova mostra, totalmente distinta por técnica e concepto. Desde hai escasos días -e ata fin de mes- está instalada no espazo a colección “Quitándolle ferro á cousa”, composta por varias pezas saídas da mente e da habilidade cos metais de Manuel Ángel Méndez. Trátase dunha proposta artística presidida polo humor e, nalgúns casos, tamén por mensaxes que instan a reflexionar cun sorriso sobre a vida e como afrontamos o noso día a día.
Son figuras abraiantes feitas con ferros cortados, dobrados, amartelados e soldados que se combinan ás veces con outros materiais, sobre todo a madeira. Todas elas mostran situacións cun toque de humor retranqueiro propio do carácter do autor, quen convida a pasar un momento agradable vendo os seus traballos.
A colección é ben variada en canto aos temas que reflicte e mesmo podería definirse como un conxunto de composicións individuais que gardan certo paralelismo coas viñetas que ilustran as primeiras páxinas dos xornais -véxase O Bichero de Luis Davila ou O Lecer de Isolino de Xaquín Marín- por aquilo de darlle unha volta a escenas da vida con humor e/ou sátira.
Neste sentido, “Quitándolle ferro á cousa” pretende, en palabras do autor, que quen visite a exposición “bote unhas risas con situacións que en realidade son moi serias. Os galegos somos así, quitámoslle ferro a todo e tiramos para adiante”.
A exposición permanecerá na galería municipal ata finais deste mes de xaneiro. Pode percorrerse nos horarios de atención ao público das oficinas, de 8:30 a 14:30h de luns a venres.
Con ela iníciase o calendario de mostras deste 2022 e, ao tempo, péchase o de 2021. No ano que acaba de rematar o Concello programou ata sete exposicións neste espazo.
Foron “Segunda face” -centrada en obras que utilizaron como lenzo máscaras respiratorias-; os paneis sobre a vida e traxectoria cultural de Carvalho Calero; os “Sentires recortables” de Tamara Painceira; as fotografías de “Pegadas dun pasado – As escolas” repasando setenta anos de ensino local; as instantáneas do fotoxornalista Xosé Castro Pepucho e do seu mestre, Alberto Martí, reunidas en “Paseando polos anos 60”; a mostra artística “De mil cores”, montada pola rapazada que participa nos cursos de debuxo e pintura da Asociación Cultural Brío e, por último, o “Medrando no rural” de Paula Aneiros.
A elas cómpre engadirlles as que houbo nos xardíns sobre Xela Arias -homenaxeada polo 17 de maio- e, xa en setembro, “Nós somos elas”, traída pola Área de Igualdade da Deputación.
