Os traballos executaranse nun prazo de seis meses, cun investimento superior aos 256.000 euros
Ademais do tratamento da vexetación, o Goberno municipal impulsará a aposta divulgativa atendendo ás novas tecnoloxías e a linguaxe inclusiva
Despois dos traballos previos levados a cabo durante o mes de decembro, o Concello da Coruña avanza nas obras de reforma integral dos xardíns de San Carlos, un proxecto que se encadra na liña de actuacións marcada pola alcaldesa, Inés Rey, para a recuperación dos xardíns históricos da cidade.
Os traballos, que se levarán a cabo nun prazo de seis meses, teñen como obxectivo garantir o respecto aos valores culturais dos xardíns de San Carlos, así como a mellora de usos e a interpretación da súa importancia, recuperando o trazado antigo sen alterar a esencia das instalacións, complementándoo con elementos de divulgación e información histórica, cultural e botánica.
O proxecto, no que o Concello realiza un investimento de 256.000 euros, engloba oito actuacións para a recuperación e mellora do patrimonio de San Carlos:
1. A propia recuperación do trazado histórico do xardín.
2. O tratamento da vexetación, cunha mellora integral dos espazos axardinados e actuando sobre os exemplares que se atopan en mal estado e as zonas carentes de vexetación.
3. Nova oferta de información e divulgación técnico-científica, reforzando a aposta polas novas tecnoloxías, especialmente con elementos de lectura dixital como os Códigos QR (botánicos e históricos), pero tamén con linguaxe inclusiva, como o braille.
4. A mellora da contorna do arboredo protexido existente, cunha limpeza manual das zonas compactadas.
5. Adecuaranse as instalacións, tamén o pavimento, cunha modalidade blanda-flexible, co obxectivo de gañar en sensibilidade e delicadeza cos elementos existentes.
6. Instalación de bancos individuais para potenciar as vistas dos miradores de San Carlos dende as fiestras.
7. O Concello restaurará as lanzas de Juan de Ciórraga e recolocaranse convenientemente.
8. A maiores, instalarase unha escultura do creador do xardín, o brigadier D. Francisco Mazarredo.
De esta forma, o Concello da Coruña busca reactivar un reclamo histórico para a cidadanía e os turistas, aproveitando ademais un pequeno pulmón verde no corazón da cidade e ofrecendo un valor engadido ao barrio da Cidade Vella.
Neste sentido, o Goberno de Inés Rey da continuidade á liña de traballos para recuperar os xardíns históricos da cidade marcada neste mandato. Recentemente, o Concello da Coruña renovou e acondicionou o estanque de Méndez Núñez, no que volve a haber peixes de auga doce. Previamente, o actual Goberno municipal declarou Méndez Núñez como Zona de Especial Protección (ZEP), acabou coa práctica dos botellóns e recuperou a Rosaleda, o almanaque floral e o reloxo dos xardíns, renovándose tamén a estatua de John Lennon cunha guitarra floral.
