― Aumentarán 11 expedicións por autoestrada cada día de luns a venres, un incremento de máis do 35%, nas franxas horarias de primeira hora da mañá e da tarde
― Reforzarase a oferta de servizos ao CHUAC, con 6 novas expedicións directas que incorporan parada no hospital, e tamén aos campus universitarios
― A conexión entre A Coruña e Betanzos disporá de máis servizos por autoestrada, algúns dos que realizarán o treito entre Ferrol e Betanzos por estrada
― Esta reestruturación, para dar resposta ao incremento de mobilidade rexistrado desde setembro, efectuouse a partir da análise da demanda e dos datos de 1.600 enquisas aos usuarios
A Xunta activa este luns o reforzo das conexións de autobús entre A Coruña e Ferrol, o que suporá a implantación de 55 servizos directos máis á semana.
A nova oferta potencia os servizos directos entre as cidades, con 55 expedicións por autoestrada máis cada semana, 11 ao día de luns a venres, o que supón un incremento superior ao 35% destes servizos.
As solucións consisten na atención da demanda específica das franxas horarias da primeira hora da mañá e da primeira hora da tarde, condicionadas polos desprazamentos por motivos de traballo e estudos entre as dúas cidades.
A este respecto, dos 11 servizos por autoestrada que se engadirán cada día, 8 funcionarán nas horas punta. O incremento da oferta permitirá aos usuarios dispoñer de autobuses directos con horas de saída que chegan a estar separadas por só 30 minutos.
Os axustes nas rutas de entrada e saída da Coruña permiten mellorar a atención de puntos de atracción de demanda significativos, como o CHUAC e os campus universitarios na Coruña. O hospital gaña 6 novas expedicións directas ao día, mentres os campus terán un servizo que minimiza o impacto do desvío para o resto de usuarios.
Ademais, nas horas punta substitúense expedicións por estrada entre as dúas cidades por servizos por autoestrada entre A Coruña e Betanzos, mentres outros se transforman en semi-directos, realizando o treito entre Betanzos e Ferrol por estrada.
Estas melloras responden á necesidade de adecuar os servizos ao incremento da demanda na conexión entre Ferrol e A Coruña que se produciu desde mediados de setembro.
A pesar de que os concellos non realizaron achegas concretas á reestruturación das liñas, xa que as súas propostas se centraron unicamente no seu ámbito territorial máis próximo, a análise dos datos de demanda e as máis de 1.600 enquisas realizadas a bordo permitiron coñecer con maior precisión as necesidades dos usuarios
No seguinte enlace pódese ampliar a información relativa aos novos horarios deste reforzo dos servizos de autobús: http://xurl.es/s97pf
