Un total de 255 familias de Lousame reservaron este ano cita para seren recibidas na Casa da Cultura Santeiros de Chave polas súas Maxestades Melchor, Gaspar e Baltasar. Unha recepción organizada con todas as medidas anticovid, de modo que cada familia desfrutou dun tempo a soas coas súas maxestades e sen interacción con outros grupos familiares.
Así, dende as 10:00 horas comezou o goteo de visitas, non tan continuo como o da choiva, que unida ao vento marcou gran parte da xornada. As familias accedían pola porta da escola de música onde, despois de hixienizar as mans, eran guiadas á porta dereita do auditorio, onde os agardaba a comitiva real. Despois, a familia saía pola porta esquerda e pola porta principal da Casa da Cultura.
Ao estar valado o circuíto, impedíase a interacción entre os distintos grupos familiares. A pesar de que cada familia tiña un máximo de 10 minutos para estar cos reis, o certo é que a maioría das visitas foron moi curtas, de apenas 3 ou 5 minutos. Cada pequeno levou para casa unha bolsa con lambonadas.
A concelleira de Cultura, Silvia Agrafojo, e o concelleiro de Obras, Ramón Martínez, asistiron durante a mañá ás recepcións, onde comprobaron que todo se facía de acordo cos protocolos anticovid marcados polas autoridades sanitarias.
