Nos pasados días efectuouse unha intervención focalizada na Torre de Bermúdez, sede do Museo Valle-Inclán da Pobra do Caramiñal, a cal está declarada como Monumento Histórico-Artístico de carácter nacional e Ben de Interese Cultural (BIC). Segundo explicaron o alcalde, Xosé Lois Piñeiro (Nós Pobra), e a concelleira da Cultura, Patricia Lojo (PSdeG-PSOE), atendeuse a conservación de urxencia da cuberta do torreón propiamente dito para evitar filtracións, polo cal se levaron a cabo traballos de retirada da vexetación existente e substitución das tellas desprendidas e rotas.
A dita actuación foi executada por Constrios S.L., por un importe de 5 687 euros, IVE incluído.
Anunciaron, ademais, a previsión de que as tarefas prosigan en 2022 na cuberta da zona expositiva anexa á Torre. Tamén indicaron que dende a Administración local se está estudando un convenio coa Consellería da Cultura que contempla a restauración de tódalas fachadas e a recuperación da pedra do inmoble. Neste senso, trasladaron o compromiso por parte do Concello para protexe-lo patrimonio público.
