Este distintivo estará presente nos establecementos que ofrezan peixe e mariscos que chegan ao porto coruñés
A alcaldesa da Coruña, Inés Rey, presentou este venres o selo de orixe ‘Peixe da Lonxa da Coruña’, que distinguirá aos peixes e mariscos que cheguen ao porto da cidade. Esta iniciativa partiu da Fundación Rendemento Económico Mínimo Sostible e Social (FREMSS) e contou co apoio e a colaboración do Concello da Coruña.
No acto, celebrado no mercado municipal da praza de Lugo, amosouse a imaxe deste distintivo, que pasará a incorporarse na lonxa, nas peixarías, nos restaurantes e entre distribuidores. “Con este selo buscamos distinguir o excelente traballo de tratamento e manipulación do peixe e marisco fresco que chega á lonxa e se distribúe desde as súas instalacións”, indicou a alcaldesa Inés Rey.
Este selo permitirá á cidadanía coñecer a orixe e tamén a calidade dos produtos que merca ou consume. O obxectivo é impulsar o consumo de peixes e mariscos locais, fomentar o seu coñecemento e poñer en valor a súa calidade. Porcúrase tamén o fortalecemento do sector pesqueiro coruñés, “un dos principais motores socioeconómicos da cidade”, apuntou a alcaldesa. A lonxa da Coruña é líder en descarga de peixe fresco, con máis de 33.000 toneladas ao ano e un valor do produto de máis de 60 millóns de euros.
O Concello e a FREMSS comezarán a promoción e divulgación deste selo para incorporalo
nas diferentes etapas de selección e distribución dos peixes e mariscos que chegan á lonxa.
O convenio asinado entre ambas partes ten un orzamento total de 30.000 euros e está financiado na súa totalidade polo Goberno municipal.
Os exportadores, as peixarías, os restaurantes e os comercios poderán desde hoxe solicitar este selo ‘Peixe da Lonxa da Coruña’ para incorporalos ás súas empresas ou establecementos. A única condición para adherirse á campaña é confirmar que a procedencia do seu peixe ou marisco é a lonxa da Coruña.
