― Actuarase na vía de altas prestacións CG-2.1, que une os municipios lucenses de Monforte e de Chantada; e nas vías ourensáns OU-131, ao seu paso pola Bola, e na OU-300, en Allariz
― Seguirán desenvolvéndose os traballos das últimas semanas nas vías lucenses CG-2.2 Lugo-Sarria, e LU-540, en Viveiro; e proseguirán os traballos na OU-138, en Xunqueira de Espadanedo, na OU-171, no Carballiño, e na OU-536, en Ourense
― Ademais seguirán os labores na provincia da Coruña, na VG-1.4, en Fisterra, na autovía AG-64 en Narón, e na AC-840, en Oza-Cesuras; prolongándose tamén os traballos na PO-531, ao seu paso polos municipios de Vilanova de Arousa, Meis, Barro e Pontevedra
― As actuacións, que se suman ás realizadas a través dos medios de conservación ordinaria, favorecen a prevención dos lumes e contribúen á seguridade viaria
― Estas tarefas levan permitido xa a roza mecánica de máis de 320 km, actuar nunha superficie de 112.500 m2 de modo manual, e retirar 1.500 árbores susceptibles de provocar lumes ou de invadir a calzada
A Xunta iniciará este luns novos traballos de limpeza nas marxes das estradas autonómicas nas provincias de Lugo e de Ourense e proseguirá cos traballos xa en marcha nas provincias da Coruña e de Pontevedra.
A Consellería de Infraestruturas e Mobilidade iniciou o pasado mes de xullo estes traballos, tras renovar coa empresa pública Seaga o contrato para acometer tarefas de roza e limpeza nas estradas autonómicas para previr lumes e reforzar a seguridade viaria, cun investimento de preto de 1,5 millóns de euros.
A vindeira semana comezarán na provincia de Lugo estes labores na vía de altas prestacións CG-2.1 Monforte-Chantada; e na provincia de Ourense nas estradas OU-131 ao seu paso pola Bola, e na OU-300, en Allariz.
Ao tempo que se inician estas novas actuacións, a Xunta seguirá cos traballos que está a desenvolver nas estradas lucenses CG-2.2 Lugo-Sarria, ao seu paso polos municipios de Lugo, do Corgo, do Páramo e de Sarria; e na LU-540, en Viveiro. Tamén, na provincia de Ourense, proseguirán os traballos na OU-138, en Xunqueira de Espadanedo; na OU-171, no Carballiño, e na OU-536, en Ourense.
Ademais continuarán as tarefas de roza e tala na provincia da Coruña, na vía de altas prestacións VG-1.4, ao seu paso polo municipio de Fisterra, na autovía AG-64, en Narón e na AC-840, en Oza-Cesuras. No caso das estradas autonómicas na provincia de Pontevedra, os traballos prolongaranse a vindeira semana na estrada PO-531 en Vilanova de Arousa, Meis, Barro e Pontevedra.
Estas actuacións contribúen á prevención dos lumes, ao eliminar especies pirófilas como o piñeiro, o eucalipto ou a acacia nas marxes das vías de titularidade da Xunta. Dáse así cumprimento á Lei 3/2007, de 9 de abril, de prevención e defensa contra os incendios forestais de Galicia, que recolle o obxectivo da rotura da continuidade horizontal e vertical da biomasa, de modo que as estradas actúen con efecto “cortalumes”.
O control da vexetación tamén supón a mellora da seguridade viaria. Os traballos realizados eliminan árbores que poderían caer á vía en caso de temporal e evitan que invadan as beiravías ou beirarrúas, facilitando o tránsito de peóns e ciclistas. Tamén serve para aumentar a visibilidade dos usuarios e consegue o efecto de afastar da vía animais como os xabarís.
Estas novas accións de conservación nas vías de titularidade da Xunta levan permitido, desde o inicio da renovación da encomenda a Seaga, a roza mecánica de máis de 320 quilómetros lineais, actuar nunha superficie de máis de 112.500 m2 de xeito manual; ademais de propiciar a retirada de 1.500 árbores en dominio público de estradas, susceptibles de provocar lumes ou que supoñían un risco de caída na calzada.
Cada semana, unha media de 30 operarios e arredor de 15 máquinas traballan para levar a cabo estas tarefas de limpeza e control da vexetación nas marxes das estradas autonómicas.
Con estes traballos tamén se dá cumprimento ao acordo do Pleno do Parlamento de Galicia do 25 de setembro de 2019, polo que se insta ás administracións públicas a impulsar unha redución progresiva do uso de herbicidas nas marxes das estradas
O departamento que dirixe Ethel Vázquez intensificou nos últimos anos as accións de prevención de lumes nas marxes das estradas da súa competencia, engadindo aos medios de conservación ordinaria un reforzo con encomendas á empresa pública Seaga.
Coa nova encomenda a Seaga, desde o ano 2018 a Xunta leva investidos 6,8 M€ nas actuacións de control da biomasa nas marxes das estradas da súa competencia.
