Os talleres de debate, que se realizarán esta fin de semana nos locais municipais do distrito e contemplan unha ruta posterior de recoñecemento, aínda contan con prazas dispoñibles
O Concello da Coruña, a través da Concellaría de Urbanismo, Vivenda, Infraestruturas e Mobilidade, realizará esta fin de semana no Barrio das Flores dous eventos asociados á elaboración do seu plan de rehabilitación integrada.
Mañá, sábado 27, de 11.00 a 13.30 da mañá, realizaranse nos locais municipais situados na rúa Azahar uns talleres de debate que lles permitirán á veciñanza e asociacións do barrio formular unhas primeiras propostas xerais de mellora para o distrito, en coherencia coas directrices xerais do plan, que se poden consultar na páxina web do Servizo municipal de Vivenda (https://www.coruna.gal/vivienda/es).
Ademais, o domingo, ás 11.00 da mañá, levarase a cabo unha ruta de recoñecemento polo barrio, aberta a toda a cidadanía, visitando os lugares que fosen máis sinalados nos talleres da xornada anterior, para estudar sobre o propio lugar as propostas realizadas.
A participación da veciñanza do barrio no proceso de elaboración do plan é un factor decisivo para verificar os resultados da análise da súa situación actual, e para que as propostas que o plan poida contemplar sexan consensuadas e validadas, desde o seu deseño inicial, cos seus residentes.
A organización prevé realizar estes talleres do sábado coa asistencia dun máximo de 30 persoas, e aínda existen prazas para que poida participar quen non o solicitase. Para facelo, poden comunicar previamente a súa asistencia na conta de correo asflores@coruna.gal, ou asistir directamente aos locais nos que se realizarán os talleres, á hora do seu inicio. Para facilitar a asistencia, haberá servizo de canguro para atender a menores.
