Esta semana de actividades do 22 ao 27 de novembro complementan ás actividades formativas que o CIM de Padrón leva facendo nos centros escolares do municipio
O Concello de Padrón, a través do CIM Terras de Iria, ten preparada unha ampla programación especial para a semana do 22 ao 27 de novembro para conmemorar o 25 de novembro, día internacional para a eliminación da violencia contra as mulleres. Un programa que inclúe dúas sesións teatrais, dúas escape-room para crianzas, un contacontos… entre outras actividades.
A programación abrirase o luns 22 de novembro, ás 19:00 horas, co acendido do alumeado de cor lila nos monumentos máis emblemáticos do concello. O martes 23 e o mércores 24 de novembro, ás 10:00 horas, programaranse dúas escape-room lúdicas-educativas contra a violencia de xénero nas que participarán o alumnado de 1º e 2º da ESO do IES Macías o Namorado e do IES Camilo José Cela.
Unhas actividades que complementan aos obradoiros pola igualdade que ven realizando o CIM Terras de Iria dende o mes de outubro co alumnado de infantil do CEIP de Flavia e das unitarias de Queiruga, Extramundi, A Ponte e Retén.
Actividades abertas ao público xeral
O resto das actividades terán lugar no auditorio municipal de Padrón, abertas á participación de calquera persoa. Así, o mércores 24 de novembro, ás 18:00 horas, Raquel Queizás porá en escena “Travesías”, un espectáculo de narración oral con monicreques dirixido a un público familiar. O venres 26 de novembro, ás 19:00 horas, Malasombra Teatro porá en escena a obra “Bernarda”, candidata ao mellor espectáculo dos Premios Max 2021.
Ao rematar a actuación, ás 20:30 horas, terá lugar o acto institucional do Concello de Padrón con motivo do 25 de novembro, que incluirá a entrega de premios ao alumnado gañador do primeiro certame de debuxos con motivo do día internacional para a eliminación da violencia contra a muller.
A programación especial do CIM Terras de Iria rematará o sábado 27 de novembro, ás 19:00 horas, coa posta en escena de “Feminíssimas”, da compañía Ste Xeito Producións. Unha programación que conta coa colaboración do Concello de Padrón, da Secretaría Xeral de Igualdade, do Ministerio da Igualdade e da Unión Europea.
