• Os proxectos comprenden traballos nos núcleos do Carabullo, O Xunco, a Escola de Seixas, Latas, Pena do Pazo e Bustabade.
O Concello das Somozas está a traballar en diversos proxectos de mellora na rede de abastecemento de auga municipal cun investimento total que supera os 50.000 euros financiados con fondos propios.
As intervencións estanse a realizar nos núcleos do Carabullo, O Xunco, a Escola de Seixas, Latas, Pena do Pazo e Bustabade.
O primeiro deles contempla a ampliación ó Carabuxo e O Xunco, na parroquia de Seixas, onde se están a estender 1.150 metros de tubaxe de polietileno de
40 milímetros de diámetro.
No caso da Escola de Seixas, a actuación comprende un incremento do servizo con 230 metros de tubaxe de polietileno de 64 milímetros de diámetro. En Latas, tamén na parroquia de Seixas, dispoñeranse 620 metros de canalización do mesmo material e con 40 milímetros de diámetro.
Finalmente, os núcleos de Pena do Pazo e Bustabade contarán con 950 metros de tubaxe de polietileno de entre 63 e 40 milímetros de diámetro.
Este conxunto de obras, segundo explicou o alcalde das Somozas, Juan Alonso Tembrás, “concretan o plan de mellora das infraestruturas municipais que se está a realizar en todo o conxunto de parroquias”. Neste sentido, o rexedor lembrou que “o Concello, ao longo destes últimos meses, leva realizadas intervencións con fondos propios coas que mellorou espazos como o CEIP O Marbán, a contorna da capela da Toca ou o acondicionamento final do novo centro cívico das Somozas”.
