— Ángeles Vázquez avanza que no prazo dun mes se definirán as primeiras vinte rutas e antes de que remate o ano prevén validarse ao redor de 3.000 km deste proxecto de cicloturismo
— Lembra que se identificarán itinerarios nas catro provincias galegas, para poñer en valor a riqueza paisaxística e cultural do máximo de concellos posibles
A Xunta de Galicia está inmersa no traballo de análise e estudo de máis dun centro de propostas de itinerarios ciclistas que poden formar parte da guía A paisaxe galega desde a bicicleta.
Así o adiantou a conselleira de Medio Ambiente, Territorio e Vivenda, Ángeles Vázquez, durante un percorrido en bicicleta polo concello de Vedra, ao carón do río Ulla, onde destacou esta iniciativa que combina turismo, deporte e riqueza paisaxística e que coa que o departamento que dirixe quere dar visibilidade á Semana europea da mobilidade.
A conselleira indicou que, ao ritmo que avanzan os traballos, a previsión do Instituto de Estudos do Territorio é definir as primeiras vinte rutas no prazo dun mes, para contar a finais de ano con ao redor de 3.000 quilómetros de percorrido cicloturístico validado.
Na actualidade, a Consellería de Medio Ambiente, Territorio e Vivenda está analizando as rutas para facer unha selección das mesmas e levar a cabo a súa validación, co obxectivo de que sexan 100% ciclables e se poida, deste xeito, descubrir multitude de paisaxes de Galicia a pedais.
Segundo manifestou, a idea é que todas as provincias de Galicia conten con rutas de cicloturismo, accesibles a todos os niveis para practicar ciclismo en familia ou como experto, e que sexan unha escolma do valor que atesouran as 12 grandes áreas paisaxísticas que recolle o Catálogo da Paisaxe de Galicia.
Indicou que se habilitará información descritiva na web da Xunta de Galicia, coa elaboración e publicación dunha ficha por cada ruta, así como os tracks, é dicir, información dixital para facilitar a navegación a través dun GPS ou dun teléfono.
Ángeles Vázquez destacou que esta iniciativa non sería posible sen a implicación e traballo da Federación Galega de Ciclismo, que coa colaboración dos concellos polos que pasan estas rutas –como é o caso de Vedra-, aglutinan e conseguen os datos necesarios para poñer en marcha esta iniciativa cun gran futuro por diante.
Por último, subliñou que o Goberno galego ve neste proxecto unha alternativa turística sustentable, integradora e saudable, polo que invitou á sociedade a concienciarse en “pedalear sen présa e admirar a riqueza natural e paisaxística verde e azul de Galicia”.
