• A Consellería de Educación acaba de denegar unha solicitude do centro para reforzar esta área, que só contaría cun docente para todo o curso escolar.
• O Concello, xunto coa comunidade educativa e a ANPA do colexio, manifesta o seu desacordo coa decisión e anuncia mobilizacións pola defensa de “ unha educación pública, en igualdade de condicións e de calidade”.
O CPI Castro Baxoi de Miño demanda máis persoal para a atención de alumnado con necesidades específicas de apoio educativo. A Consellería de Educación acaba de denegar unha solicitude formal do colexio para reforzar esta área, que na actualidade conta con só un docente para o curso escolar que acaba de empezar.
O Concello, a comunidade educativa e o ANPA manifestan o seu desacordo coa decisión e anuncian mobilizacións para que a Xunta de Galicia incremente o número de traballadores en correspondencia co aumento de matrículas.
As instalacións do CPI Castro Baxoi contan cunha aula dedicada á atención de estudantes con necesidades educativas especiais, cuxa cifra de alumnos crece co paso dos anos. Durante o curso pasado, o centro contaba con dous profesores, un de Pedagoxía Terapéutica e outro de Audición e Linguaxe; este ano a Xunta decidiu retirar a praza de Audición e Linguaxe.
A dirección do CPI Castro Baxoi trasladou a semana pasada unha petición dirixida á Consellería na que demandaba a restitución da praza eliminada e a incorporación dun novo profesor de Pedagoxía Terapéutica. Desde a ANPA do colexio manifestan que “só así se podería prestar unha educación pública de calidade para ou alumnado con necesidades especiais, que ten dereito ás mesmas condicións e calidade formativa que ou resto de matriculados”
Con todo, o centro recibiu este luns unha confirmación verbal por parte da Consellería de Educación de que a solicitude sería denegada. #Ante estes feitos, o claustro de profesores e a ANPA do Castro Baxoi anuncian mobilizacións para “poder así cumprir co noso labor e atender ou alumnado coas garantías e as condicións que establece a lexislación”.
A ANPA pon ao dispor das familias e de calquera persoa que apoiar as manifestacións en defensa “ dunha parte do alumnado especialmente vulnerable” o número 678 492 235.
