A asociación europea Atlantic Cities, da que forma parte o Concello da Coruña, representa ás cidades atlánticas membros desta rede e apoia o seu desenvolvemento común creando proxectos conxuntos
O concelleiro de Urbanismo asistiu esta mañá a unha asemblea xeral do organismo en Viana do Castelo, na que se abordou a mellora desta conexión para lles dar saída ás mercadorías dos portos e vertebrar o norte e o interior da comunidade
O concelleiro de Urbanismo, Juan Manuel Díaz Villoslada, participou esta xornada na asemblea xeral anual organizada pola Rede Atlantic Cities en Viana do Castelo. Na dita asemblea abordáronse cuestións como os avances na execución da rede transeuropea de transporte (RTE-T) e do Mecanismo «Conectar Europa» (MCE) para o transporte. Neste cume en concreto defendeuse a necesidade de potenciar, no ano europeo do ferrocarril, a conexión da fachada atlántica, mellorando a estruturación da rede central da RTE-T, fortalecendo a rede ferroviaria Bilbao-A Coruña e incluíndo un tramo entre Vigo e Porto para
garantir a circulación entre A Coruña e Lisboa.
O Goberno de Inés Rey fixo unha aposta forte polo corredor atlántico e o seu ramala Galicia a través do eixe Coruña-Vigo-Ourense-León, que incluíu a UE no novoregulamento do MCE. O edil defendeu a necesidade de potenciar “as redes básicas do transporte europeo coa nova conexión portuaria, clave para lles dar saída ás mercadorías dos nosos portos e vertebrar mellor todo o norte e interior da comunidade no Arco Atlántico”.
Atlantic Cities é unha asociación europea de carácter transnacional que representa os intereses e as iniciativas das autoridades locais (cidades, mancomunidades urbanas, deputacións…) ao longo do Arco Atlántico, conformado po Irlanda, Oeste de Reino Unido, Oeste de Francia, Norte de España, Illas Canarias e Portugal. A súa misión é representar ás cidades atlánticas e apoiar o seu desenvolvemento común e xestionar o interese público trasladándolles os seus problemas e necesidades aos estados, ademais de crear proxectos entre as cidades.
