O CRI de Santiago acolleu unha nova xornada formativa no marco do proxecto europeo ‘Mocidade Contra la Violencia de Xénero’, do que é socia a Xunta
Oito mozas e mozos galegos iniciaron esta fin de semana a súa formación dentro da segunda parte do proxecto europeo ‘Mocidade Contra la Violencia de Xénero’, no que participa a Xunta desde hai dous anos e que ten como obxectivo apoiar a prevención da violencia de xénero entre a poboación máis nova.
As xornadas formativas tiveron lugar este sábado e domingo no Centro de Recuperación Integral para mulleres que sofren violencia de xénero, en Santiago, e abordaron asuntos como a vitimización das mulleres, os efectos directos e indirectos da violencia de xénero, a dependencia emocional ou a educación sentimental, entre outros.
As alumnas e alumnos das xornadas levarán posteriormente ás aulas de diversos centros educativos galegos o debate sobre a violencia machista, utilizando para elo o método da Peer Educación ou Educación entre Iguais, cun enfoque participativo e utilizando metodoloxías activas.
Nas sesións que se levarán a cabo nos centros o alumnado gravará diversos vídeos que aborden a temática da violencia de xénero, que se subirán á páxina oficial do proxecto: http://www.jcvg.eu e poderán ser votados para converterse nos vídeos oficiais do proxecto. O vídeo seleccionado difundirase en España, Italia, Romanía, Brasil, Cabo Verde e Mozambique, os seis países socios no proxecto.
Mocidade Contra la Violencia de Xénero
A partir de marzo de 2015 a Secretaría Xeral da Igualdade vai desenvolver a segunda parte do proxecto europeo ‘Mocidade contra a violencia de xénero’, que busca previr futuros casos de violencia machista a través da formación en igualdade das mozas e mozos galegos.
A Xunta adheriuse en 2013 a este proxecto, que está financiado por la Unión Europea e liderado pola cidade italiana de Turín. Ademais do Goberno galego, participan como socias no proxecto outras doce entidades de España, Italia, Romanía, Cabo Verde, Mozambique e Brasil.
A Xunta considera fundamental desenvolver este tipo de actuacións, xa que os adolescentes resultan ser un colectivo especialmente vulnerable fronte á violencia de xénero e se están a detectar neles novas formas de exercer a violencia, como consecuencia dun mal uso das novas tecnoloxías. A máis habitual é o dominio psicolóxico, a través do control sobre a roupa, maquillaxe, amizades e hábitos das parellas nas redes sociais.
Para mellorar estes aspectos, o proxecto aborda campañas de sensibilización da opinión pública sobre asuntos como a masculinidade positiva, a loita contra a violencia cara as mulleres e o respecto ás persoas LGBT.
