― O desenvolvemento dos traballos suporá afeccións ao tráfico e tentarase reducir ao máximo o prazo de execución, inicialmente estimado en seis meses
― A intervención integral mellorará a seguridade e garantirá a conservación da ponte, ben catalogado patrimonialmente e que forma parte da AC-196
― O proxecto inclúe actuacións para a iluminación monumental da infraestrutura
― Esta actuación enmárcase no programa de inspección e control das pontes e obras de paso que desenvolve a Xunta para reforzar a seguridade e alongar a súa vida útil
A Xunta iniciará a próxima semana as obras de rehabilitación e posta en valor da ponte Nafonso, na estrada AC-196, entre os municipios de Noia e de Outes, que suporá un investimento autonómico de máis de 700.000 euros.
As obras impulsadas pola Consellería de Infraestruturas e Mobilidade na ponte Nafonso, un ben catalogado patrimonialmente, consistirán na substitución do pavimento e da varanda existente, que se atopa deteriorada.
Ademais, levarase a cabo a limpeza dos paramentos exteriores coa fin de mellorar o seu aspecto estético, eliminando os elementos danados da fachada da fábrica de pedra para mantela en bo estado de conservación.
O proxecto tamén prevé dúas actuacións concretas para iluminar a calzada e para a iluminación monumental da propia ponte, o que permitirá a súa posta en valor e unha notable mellora na seguridade viaria para vehículos e peóns. Ademais colocaranse paneis informativos e carteis de localización.
A execución destas obras non son compatibles co tráfico na ponte, dado que este é moi estreita. Por iso se colocarán os correspondentes carteis informativos de aviso, dous na AC-550 e na estrada provincial DP-5602. Desde xeito, para minimizar no posible a afección no tráfico o departamento de Infraestruturas da Xunta tentará acurtar na medida do posible o prazo contractual das obras, que é de 6 meses.
Programa pioneiro da Xunta
Esta intervención enmárcase no programa pioneiro de control das pontes e obras de paso que está a desenvolver a Xunta, para preservar a seguridade e alongar a vida útil destas infraestruturas, con actuacións de conservación preventiva.
O departamento que dirixe Ethel Vázquez continúa traballando no mantemento das estradas autonómicas co obxectivo de reforzar a seguridade viaria.
