• As actuacións están programadas para os sábados 7, 14 e 21 de agosto, ademais dunha cita dobre o domingo 15.
A Concellería de Cultura de Malpica, dentro da Rede Cultural 2021 da Deputación da Coruña, acaba de presentar unha programación para o mes de agosto repleta de teatro, música e diversión para todos os públicos. Os ‘Seráns na rúa’ comezarán o sábado 7 de agosto e celebraranse durante os fins de semana ata o día 21.
A primeira das actuacións será apta para todos os públicos e realizarase no paseo da Praia. O sábado 7 de agosto chega ‘Velliñas’, de Butaca Zero Inherente Teatro, a partir das 20:00 horas.
Nese mesmo horario, pero o sábado 14 de agosto, chegará o segundo dos espectáculos programados. ‘A música das buguinas’, de Mamá Cabra & Bellón e Maceiras, trátase dunha actuación para toda a familia que se representará na praza do Campo.
O domingo 15 de agosto será a quenda dunha cita musical dobre a Canido que comezará ás 21:00 horas co concerto de Arredores. Unha hora máis tarde, ás 22:00, Xabier Díaz e Adufeiras de Salitre continuarán co espectáculo enriba do escenario.
Finalmente, o sábado 21 de agosto a partir das 20:00 horas pecharanse os ‘Seráns na rúa’ coa representación de ‘Isolada’ a cargo de Pajarito. Neste caso, a obra está recomendada para maiores de 8 anos.
O aforo estará limitado a 50 persoas en todos os espectáculos agás nos concertos de Arredores con Xabier Díaz e Adufeiras de Salitre, nos que estarán dispoñibles 150 entradas. En calquera caso só será necesario reservar entradas de xeito previo para a actuación do 15 de agosto. Deberase enviar un correo electrónico a malpicacultura@gmail.com.
– No resto de espectáculos poderanse gardar asentos media hora antes do comezo da función.
