· O protagonista é titulado en Enxeñería Informática e sumou os seus coñecementos cos do seu irmán para crear esta ferramenta.
· Cada mes publicarase na páxina web www.eusoncamarinas.es un vídeo cunha entrevista a un veciño ou veciño de Camariñas que destaque no seu ámbito profesional, académico, deportivo, artístico ou social.
O Concello de Camariñas publicou a quinta entrega do programa ‘Eu Son Camariñas’ que lle dá voz Fran Pais Fondo, un enxeñeiro informático e Chief Technology Officer (CTO) da aplicación móbil ‘Breiko Breiko’.
‘Eu son Camariñas’ é un proxecto municipal creado para dar visibilidade a diversos camariñáns que destacan no seu ámbito profesional, académico, deportivo, artístico ou social. A nova proposta consiste en publicar mensualmente na páxina web www.eusoncamarinas.es un vídeo cunha entrevista a un destes camariñáns senlleiros.
Nesta ocasión o protagonista e Fran Pais Fondo, que sumou os seus coñecementos en informática e novas tecnoloxía cos do seu irmán Mario -experto en transportes- para crear a ferramenta ‘Breiko Breiko’. Esta aplicación móbil está a revolucionar a súa área e postúlase a ser imprescindible en todo o mundo. A través deste sistema, a cidadanía pode situar unha pregunta no mapa para que o resto da comunidade a responda. Deste xeito, os usuarios e usuarias poden obter indicacións de como chegar ou saír dalgún lugar, evitar problemas, aforrar tempo e combustible grazas ás recomendacións do resto de usuarios e usuarias. Así mesmo, as persoas que empreguen esta app disporán de toda a información de incidencias da rede de estradas, cunha actualización constante.
Eu Son Camariñas
Un dos propósitos orixinais do proxecto consistía en dar visibilidade aos camariñáns que lograron notoriedade ao longo da historia, tanto dende a nosa vila como dende a diáspora. Ademais pretendíase crear un escaparate dende o cal se reflexe o traballo desa xuventude estudosa, traballadora e emprendedora do Concello de Camariñas. Crear unha ventá que amose ao mundo todas as virtudes desas artesás, deportistas, escritores, mariños, empresarios… pequenas historias das nosas xentes que deu e seguirá dando este concello cheo de talento.
A alcaldesa de Camariñas, Sandra Insua, explicou que “a nova etapa deste proxecto tamén pretende inculcar un chisco de esperanza a todos os nosos veciños e a toda esta xeración que está a formarse dentro das escolas de todo o concello”.
