O concelleiro de Urbanismo, Infraestruturas e Mobilidade, Juan Díaz Villoslada, destacou este dato na reunión de seguimento do Grupo de Acción e Participación Urbana (GAU) que acolleu esta tarde o Centro Cívico dos Mallos
O Concello da Coruña volveu reunir esta tarde o Grupo de Acción e Participación Urbana (GAU) no Centro Cívico dos Mallos para analizar o conxunto dos proxectos EIDUS por valor de 18 millóns de euros para mellorar a cidade en diferentes aspectos, dos que 10 millóns de euros xa están executados, licitados ou en execución.
O concelleiro de Urbanismo, Infraestruturas e Mobilidade, Juan Díaz Villoslada, destacou este dato nesta reunión de seguimento en que tamén participou a concelleira de Benestar Social, Igualdade e Participación, Yoya Neira, e Santiago Roura, director da Unidade de Xestión de EidusCoruña, así como reitor da UDC, Julio Abalde, representantes do polígono de A Grela, Confederación de Empresarios, federacións e asociacións de veciños/as, sindicatos, Autoridade Portuaria, Anpas e da área sanitaria.
Na sesión de hoxe tamén se deu conta do grao de desenvolvemento da Axenda Urbana da Coruña e dos últimos acordos aos que chegou o Concello co Ministerio de Transportes, Movilidad y Agenda Urbana para o levar a cabo o Plan Estratéxico de Acción Local da Coruña (PEAL).
Na sesión de hoxe tamén se deu conta da situación da preparación da Axenda Urbana da Coruña, un plan estratéxico de nova xeración que pretende resolver os retos e os desafíos do presente e do futuro da nosa cidade e a súa área metropolitana.
O GAU é o órgano de consulta, participación e coordinación social da Estratexia EidusCoruña, que preside a concelleira de Benestar Social, Igualdade e Participación, Yoya Neira. A súa creación acordouse na sesión ordinaria da Xunta de Goberno Local do pasado 15 de xullo de 2020.
As funcións operativas do GAU son, entre outras, participar na realización dos informes de avaliación intermedia e final da Estratexia EidusCoruña e intervir na realización dos procesos de auditoría externa e interna que se levarán a cabo na implementación desta estratexia. Yoya Neira salientou ademais a función do GAU no proceso de “velar polo cumprimento dos principios transversais, especialmente a igualdade de oportunidades, ao longo da execución da estratexia”.
Por outra parte, o GAU pon a disposición da cidadanía, tanto de forma presencial como a través de medios de comunicación, web, redes sociais, eventos etc. os avances da EidusCoruña.
O Grupo de Acción e Participación Urbana está cofinanciado nun 80% polo Fondo Europeo de Desenvolvemento Rexional (FEDER) no marco do programa operativo plurirrexional de España 2014-2020.
