• A oferta de actividades inclúe ensinanza de surf, deportes de raqueta, sobre rodas ou fútbol sala, entre outras.
• A inscrición deberá realizarse de xeito presencial na Casa do Concello de Malpica.
A concellería de Deportes do Concello de Malpica preparou para os meses de xullo e agosto un amplo programa de campamentos para a veciñanza máis nova. As actividades inclúen campus de fútbol sala, deportes sobre rodas, de raqueta ou surfing, entre outras.
En total, Malpica conta con tres campamentos deportivos, que están destinados a mozas e mozos que saiban nadar e que naceran entre o 2008 e o 2014. As sesións impartiranse en horario de 10:30 a 14:00 horas en varias datas de xullo e agosto.
Por outra banda, a praia de Area Maior acollerá catro cursos de surf para rapazada de entre 8 e 13 anos que saiba nadar. Tanto os horarios como o número de prazas varía en cada un deles.
Celebrarase, ademais, un campus de deportes de raqueta para mozos de 7 a 14 anos, outro de deportes sobre rodas (ciclismo, skate, seguridade viaria…) de 8 a 15 anos e un campus de fútbol sala para nados entre 2008 a 2014.
A cota de inscrición será de 21,71 euros por participante. Deberá haber como mínimo seis persoas apuntadas para desenvolver as actividades.
Tamén se organiza o ‘Actívate na praia’, aberto a todas as idades e de carácter gratuíto, e sesións de tenis de mesa e bádminton no pavillón previa solicitude no rexistro municipal do Concello.
O prazo para anotarse nos campamentos xa está a aberto. O trámite deberá facerse de xeito presencial na Casa do Concello, onde se deberá presentar a documentación e aboar a correspondente cota.
Desde a concellería de Deportes destacaron o “amplo abano de opcións para que a rapazada malpicá descubra ou siga practicando deportes no noso municipio, aproveitando as nosas instalacións e o noso entorno”.
