• O Concello iniciou nas últimas semanas os traballos de retirada de vexetación de zonas públicas de todas as parroquias, así como nas marxes da rede de estradas municipais.
O Concello de Malpica rematou nos últimos días os traballos de limpeza e acondicionamento do entorno do lavadoiro de Mens. Esta actuación encádrase dentro dun programa de conservación das áreas recreativas de todas as parroquias do municipio que comezou nas últimas semanas.
Entre as tarefas que se están a realizar nestas intervencións está a roza da masa vexetal e a súa retirada, así como a limpeza do pavimento nos casos onde sexa necesario.
Ademais do acondicionamento destes espazos, o Concello está a executar paralelamente os traballos de desbroce nas marxes da rede viaria municipal. A intención é completar o acondicionamento de todas as parroquias ó longo dos meses de verán.
Desde o goberno local destacaron “a importancia destas actuacións, que a pesar de que poidan parecer algo rutineiro, son moi necesarias para que a veciñanza poida gozar do noso entorno agora que chegou o bo tempo”. “No caso da limpeza das estradas, os traballos avanzan a bo ritmo e agardamos poder asegurar a condición de circulación nas pistas asfaltadas municipais nas vindeiras semanas”, concluíron.
