O concelleiro de Memoria Histórica, Jesús Celemín, participou na apertura deste servizo en que se resolverán cuestións legais xurídicas, psicolóxicas e históricas e se recoñecerá a persoas que foron obrigadas a se exiliaren ou que xa faleceron
O concelleiro de Memoria Histórica, Jesús Celemín, participou este mediodía na apertura do punto de información para as vítimas do franquismo que a Universidade instalou no CUR en colaboración co Concello, e en que se resolverán cuestións históricas, psicolóxicas e xurídicas e se recoñecerá a persoas que foron obrigadas a se exiliaren ou que xa faleceron.
O edil sinalou que será por tanto un punto de xustiza, solidariedade e reparación da dor e da memoria, en definitiva, da historia: “Será un lugar onde non vai existir revanchismo, nin se vai ir en contra de ninguén. Neste punto, porase en valor o que se ocultou durante anos e agardamos que perdure no tempo e que se normalice dentro dese proceso de recuperar a memoria que busca o Goberno de Inés Rey.
Pola súa parte, o director da cátedra de Memoria Histórica, da que xurdiu a iniciativa, Uxío Breogán, explicou que o punto de información lle ofrecerá asistencia a persoas que foron desde o inicio do período franquista até o final, catro decadas de ditadura e mais na transición, protagonistas deste tempo de terror, ademais de servir como reencontro para moitas/os familiares que non dispoñeron até o momento dun espazo en que transferiren coñecementos, experiencias e dores.
Deste xeito, procuraranlles acougo desde xa a través dun sistema de cita previa, en que as/os interesados en obter información, deberán enviar un correo electrónico a catedra.memoria.historica@udc.es. Cando a situación se normalice, dez investigadores e docentes máis outras persoas asociadas prestarán este servizo durante tres días á semana no propio CUR.
O reitor Julio Abalde destacou que ademais dun espazo de reflexión, esta novidade funcionará como unha oficina para lles aclarar ás vítimas aspectos legais xurídicos e sociolóxicos e afirmou que neste tempo xa recibiron requirimentos e preguntas de familiares que se están resolvendo desde a cátedra.
