O Play-Doc de Tui, o Curtocircuíto de Santiago de Compostela, o (S8) da Coruña e o festival de Cans son os encontros beneficiarios das maiores contías
A convocatoria deste ano valorou as propostas específicas para o ámbito dixital e o esforzo realizado para manter as edicións de 2020 no contexto da pandemia
Supón un incremento do 5% e enmárcase no Plan de Reactivación da Cultura para a recuperación da actividade e para preservar o emprego artístico e técnico
A Xunta de Galicia vén de resolver a convocatoria de subvencións destinadas aos festivais galegos do sector audiovisual, pola que este ano se contribúe ao financiamento de 14 encontros, entre os que se distribúen os 200.000 euros da dotación para 2021 desta liña de axudas que xestiona a Axencia Galega das Industrias Culturais (Agadic).
Os beneficiarios son o Play-Doc Festival Internacional de Documentais de Tui (36.930,96 euros), Festival Internacional de Cinema Curtocircuíto de Santiago de Compostela (36.240,05 euros), (S8) Mostra Internacional de Cinema Periférico da Coruña (29.624,56 euros), Festival de Cans de Curtametraxes, no Porriño, (28.419,73 euros), Festival Internacional de Curtametraxes de Bueu (16.984,10 euros), Festival Carballo Interplay (14.584,09 euros), Novos Cinemas-Festival Internacional de Cinema de Pontevedra (9.949,08 euros), 43ª Semana de Cine de Lugo (7.350,09 euros), Intersección-Festival de Arte Audiovisual Contemporánea, na Coruña, (7.042,72 euros), MICE Mostra Internacional de Cinema Etnográfico do Museo do Pobo Galego, en Santiago de Compostela, (5.171,44 euros), 6º Festival Internacional de Curtametraxes de Verín (3.220,89 euros) e mais os eventos que se celebran en Vigo VI Festival de Cine Inclusivo (2.239,77 euros), Festival Primavera do Cine (1.376,07 euros) e Galician Freaky Film Festival (866,45 euros).
A dotación da convocatoria para 2021, que se resolveu en réxime de concorrencia competitiva, supón un incremento do 5,2% respecto a 2020, co que se mantivo a tendencia á alza no seu orzamento desde a creación en 2015 desta liña de apoio. A ela puideron optar festivais cun mínimo de tres edicións anteriores realizadas en anos consecutivos e que na súa programación conteñan o cinco por cento de títulos ou cinco sesións de produción cinematográfica e/ou dirección galegas.
Adaptados ao actual contexto
Enmárcase no Plan de Reactivación do sector cultural que ten en marcha a Xunta co que se lle está dando resposta á situación pola que atravesan os profesionais con motivo da evolución da pandemia, sumándose a outras iniciativas específicas. A través del, búscase contribuír á recuperación da actividade e preservar o emprego no conxunto do sector, tanto desde o punto de vista artístico como técnico. Tamén se pretende recuperar a confianza do público na asistencia aos espectáculos, garantindo a seguridade en teatros, auditorios e demais recintos, en cumprimento estrito das medidas sanitarias en vigor.
As bases da convocatoria deste ano introduciron unha serie de novidades nos criterios de valoración, a través das que se tomou en consideración o esforzo dos festivais por manter a súa celebración en 2020, adaptándose ao contexto da pandemia da covid-19 sen menoscabo da súa calidade. Entre os criterios a puntuar atopábase, así mesmo, a proposta de accións específicas para o ámbito dixital.
