As faias centenarias eran unhas das árbores máis salientables que hai anos se podían ver nas proximidades da actual Casa do Concello. Hoxe o Concello convidou ao CEIP San Ramón a conmemorar o Día do Medio Ambiente coa plantación de cinco novos exemplares, que se suman aos plantados hai escasos anos..
O alumnado de 3º e 4º de Primaria traballou esta mañá coa axuda dun empregado municipal poñendo na terra cinco árbores, unha por parroquia co obxectivo de “velas medrar cando veñamos por aqui”, tal e como comentou a rapazada.
Logo de faceren o labor recibiron da bibliotecaria municipal un breve documento sobre o Día do Medio Ambiente, que precisamente este ano reivindica as accións de recuperación dos ecosistemas danados pola acción humana. Ademais, con motivo desta data -que se celebra mañá sábado- a ONU tamén recomenda incrementar os espazos verdes e a plantación de arborado nas tramas urbanas.
Despois dunha intensa mañá de traballo, a cativería tivo tempo para descansar merendando á sombras das outras árbores da zona. Moeche súmase así á iniciativa da Oficina do Parlamento Europeo no Estado español #IUnhaÁrboreporEuropa
