A pesar do impacto da covid na hostalería, responsable da xeración de máis do 50% deste tipo de residuos, os fogares galegos reciclaron máis vidro durante o ano pasado, o que permitiu paliar a notable caída do consumo de envases
Os galegos achegaron en 2020 a través dos contedores verdes case 50.000 toneladas deste tipo de refugallos, unha media de 18,3 kg por cada habitante
Ecovidrio tamén puido recuperar 20.600 toneladas deste material procedentes do complexo de Sogama en Cerceda, o que supuxo un 8,5% máis que o ano anterior
Cada galego depositou durante o ano pasado unha media de 63 envases de vidro nos contedores verdes, unha cifra superior á media española (61 por persoa) e que supón ademais unha mostra do compromiso crecente coa recollida selectiva da cidadanía galega, que nun ano marcado pola covid conseguiron seguir reciclando máis e mellor.
Neste sentido, cómpre lembrar que a pesar do impacto que supuxo a pandemia para a actividade hostaleira, un sector tradicionalmente responsable de máis do 50% dos envases de vidro do mercado, a nivel doméstico a reciclaxe deste tipo de material aumentou.
De feito, estudos encargados por Ecovidrio, a entidade sen ánimo de lucro que xestiona o reciclado deste tipo de residuos en España, conclúen que durante o pasado exercicio os cidadáns consumiron máis vidro nos seus fogares que outros anos pero tamén o reciclaron con maior intensidade. Este comportamento explica que, fronte a un descenso estimado nun 11% da circulación deste tipo de envases a nivel nacional, a caída do material recollido a través do contedor verde na Comunidade foi de tan só un 5%.
En concreto, os cidadáns galegos depositaron de forma separada case 50.000 toneladas de envases de vidro (49.380 toneladas) o que supuxo por termo medio uns 18,3 kg por habitante, é dicir, medio quilo máis que a media española.
En todo caso, cómpre resaltar que o ano pasado se puideron recuperar a maiores outras 20.600 toneladas de vidro procedentes da bolsa negra e que foron recuperadas no complexo medioambiental de Sogama en Cerceda co fin de reintroducilas no ciclo produtivo como material para fabricar novos envases. Este dato supuxo un incremento do 8,5% respecto ao do ano anterior, cando as achegas de vidro de Sogama foron de 18.999 toneladas.
A estas cifras contribuíu tamén a presencia dunha rede en constante crecemento composta por 16.970 contedores repartidos polas catro provincias e o esforzo realizado por toda a cadea da reciclaxe de vidro en Galicia durante a pandemia, un período no que se mantivo en todo momento activo o servizo de recollida a nivel municipal coas súas 160 rutas semanais.
En todo caso e coincidindo coa Semana do Medio Ambiente —que terá o seu día grande este sábado, 5 de xuño—, cómpre lembrar a importancia de seguir fomentando a conciencia cidadá sobre a recollida selectiva, un obxectivo polo que a Xunta traballa en colaboración con Ecovidrio e Ecoembes co fin de seguir incrementando as taxas de reciclaxe en Galicia e avanzar así na liña dos obxectivos da economía circular.
A este respecto, cómpre lembrar que a reciclaxe de envases de vidro é unha boa maneira de demostrar que os residuos poden ter unha segunda vida, un modelo que conecta ademais coa Axenda 2030 da ONU e con ata seis dos seus 17 Obxectivos de Desenvolvemento Sostible (ODS).
A modo de exemplo, grazas ao vidro que se recuperou ao longo de 2020 só en Galicia evitouse a emisión de 40.588 toneladas de CO2 equivalentes a retirar case 19.000 coches da circulación durante un ano; impediuse a extracción de 83.976 toneladas de materias primas da natureza (area, sosa e caliza) equivalentes a máis de 8 veces o peso da Torre Eiffel; e aforráronse 49.980 MWh de enerxía, o equivalente ao consumo enerxético de todos os hospitais de Galicia durante máis de dous meses.
