Os feitos ocorreron onte en Catro Camiños cando o arrestado lle mostrou fotografías de xoves nus e comezou a tocalo sen o seu consentimento até que requiriu a presenza dos axentes
A Policía Local detivo onte un veciño de Culleredo de 74 anos por cometer un suposto delito contra a liberdade e indemnidade sexual dun menor de 16 anos. Dous equipos policiais acudiron á zona de Catro Camiños sobre as once da mañá despois de que o mozo lles requirira a súa presenza ao ser vítima presuntamente de tocamentos por parte deste suxeito, quen previamente lle ensinou fotografías de xoves nus. O denunciante sinaloulles quen era o agresor e os axentes solicitáronlle seguidamente a documentación á vez que lle informaron do motivo da súa intervención. Así foi como o arrestado comezou a manipular o seu móbil dun xeito apresurado para borrar as imaxes de contido sexual que tiña gravadas, polo que lle suxeitaron do brazo evitando que esas probas se perderan.
Máis tarde, un segundo equipo entrevistou o denunciante, que lles contou que estaba descansando nun banco cando o detido lle pediu lume e sentou xunto a el para lle piropear e mostrarlle as fotos. O rapaz relatoulles tamén que o varón lle introduciu a man no interior da súa camiseta e que lle acariciou as costas chegando ás nádegas, polo que tratou de se defender do home e pediu axuda á policía. Con estes supostos indicios, os axentes detiveron o septuaxenario, que ingresou nos calabozos para poñelo ao dispor da autoridade xudicial. Tamén se lle interveu o terminal, sobre o que investigarán se esta persoa participou antes noutros feitos delitivos
