Mantén aberta a posibilidade a celebrala no que queda de 2021 se as condicións sanitarias así o permiten
O Concello de Frades vese na obriga de aprazar a Festa dos Nosos Maiores 2021, que estaba previsto celebrar o próximo 29 de maio, diante da situación actual de pandemia sanitaria pola Covid-19 e en cumprimento dunha normativa que impide de momento as xuntanzas de grandes grupos de persoas. Así mesmo, informa de que, no caso de que as circunstancias sanitarias permitan a súa celebración no que queda de ano 2021 respectando todas as medidas de seguridade que estean vixentes nese momento, o Concello de Frades faría chegar unha nova convocatoria a todas e cada unha das persoas participantes.
A Festa dos Nosos Maiores é unha homenaxe que o Concello de Frades fai, o derradeiro sábado de cada mes de maio, aos veciños e veciñas de máis de 65 anos no municipio e que na súa última edición (2019) reuniu a máis de 550 persoas na carballeira de San Nicolao. Celébrase dende o ano 1998 e ata hoxe só fora suspendida nunha ocasión: no ano 2020 como consecuencia do confinamento pola pandemia da Covid-19.
Dende o Concello de Frades faise un chamamento á veciñanza para que continúe cumprindo con todas as normas sanitarias que trasladan as administracións competentes e lembra que, pesa a que gran parte da poboación xa está vacinada, o virus continúa presente. Así mesmo, o Concello agradece o bo comportamento dos veciños e veciñas do municipio, o que permite que levemos varias semanas sen que aparezan novos casos positivos.
