En todas estas localidades celebráronse charlas, obradoiros e exposicións, entre outras iniciativas
programa Primavera Xove da Xunta de Galicia celebrou hoxe unha nova xornada nos espazos xove de Curtis, Ourense e Vilalaba. Hoxe, a directora xeral de Xuventude, Participación e Voluntariado, Cristina Pichel, asistiu á feira celebrada no municipio coruñés, onde tivo lugar unha charla sobre sostibilidade e liñas de negocio, así como tamén se repasaron os perfís laborais máis demandados polo departamento de recursos humanos.
Aquí programáronse diferentes actividades, a primeira sobre a seguridade viaria, a cargo dun corredor de rallies; a esta lle seguiu un obradoiro Dj, no que se fixo unha exhibición musical sobre a mestura de distintos tipos de sons; e por último unha actividade sobre a customización de gorras.
En Ourense
Ademais das actividades en Curtis, a directora xeral tamén visitou as celebradas no Espazo Xove de Ourense, no que se realizaron diferentes iniciativas como unha exposición fotográfica de catro artistas ou unha xornada de xogos tradicionais organizados polo alumnado de prácticas do CIFP Portovello.
Tamén tivo lugar un faladoiro a cargo da psicóloga Patricia Gómez Salgado seguido dun obradoiro de deseño creativo de letras, da man de Gabriela Dueñas. Tamén se levou a cabo unha clase demostración de guitarra que rematou cunha actuación musical, a última programación foi un obradoiro de breakdance organizado polo grupo do Espazo Xove.
En Vilalba
Pola súa banda, na localidade lucense de Vilalba a xornada estivo centrada na celebración de senllos obradoiros de graffitis e pinchadiscos para rematar cunha exhibición de xadrez por un profesional deste eido.
Cristina Pichel puxo en valor este tipo de actividades enmarcadas no Programa Primavera Xove, programa novidoso posto en marcha este ano, que ao longo de todos os venres do mes de maio celebra unha feira de ocio educativo para a mocidade da súa contorna nos diferentes Espazos Xove. Recordou que son unha oportunidade única para garantir que a xuventude manteña un ocio seguro ao tempo que segue desfrutando de foros formativos e espazos de entretemento.
Para máis información sobre a programación da iniciativa Primavera Xove: http://xuventude.xunta.es/primavera-xove
