A alcaldesa, Inés Rey, agarda que a Refinaría levante o expediente regulador dado o ritmo actual de vacinación e o restablecemento da mobilidade entre comunidades
A alcaldesa, Inés Rey, sinalou esta mañá estar en permanente contacto con Repsol e co seu comité de empresa, co que se reuniu hoxe xunto ao voceiro municipal, José Manuel Lage, co fin de lles amosaren ás
traballadoras e traballadores o seu apoio incondicional tras o anuncio dun ERTE de cinco meses. A rexedora facilitoulles ás persoas representantes un espazo de encontro coa firma en que defenderen a viabilidade da Refinaría pola importancia que ten na cidade a nivel económico e social. Por todo o que isto implica, Rey conta con que a compañía cumpra co seu compromiso no mantemento de postos de
traballo.
Rey incidiu na necesidade de que a compañía invista para garantir a súa viabilidade dentro dun proceso de transición enerxética a modelos “máis eficaces e sustentables”. Agarda polo tanto que levanten o ERTE, unha vez que as causas esgrimidas por Repsol se solucionen. A rexedora espera a pronta recuperación da Refinaría e que actúe o antes posible dado o ritmo actual de vacinación na cidade e
o restablecemento da mobilidade entre comunidades. Ademais, anunciou que se levará a pleno unha moción dos sindicatos da empresa co fin de reafirmar o compromiso municipal co seu persoal traballador.
