Máis de 97.000 veciños de Santiago de Compostela poderán obter premios sustentables de carácter comunitario e social ao reciclar as súas latas e botellas de plástico de bebidas nos case 600 colectores amarelos situados na vía pública. Trátase dunha iniciativa conxunta do Concello de Santiago, Xunta e Ecoembes, que hoxe presentaron en Santa Marta Mila Castro, concelleira de Políticas Sociais, Saúde, Medio Ambiente, Parques e Xardíns do Concello de Santiago de Compostela; Ángel Hervella, director de Xestión Local e Autonómica de Ecoembes; e Sagrario Pérez Castellanos, directora xeral de Calidade Ambiental, Sustentabilidade e Cambio Climático da Xunta de Galicia.
Os habitantes de Santiago de Compostela comprometidos coa reciclaxe obterán a partir de hoxe recompensas cada vez que reciclen as súas latas e botellas de plástico de bebidas. Isto é posible grazas á aposta da Xunta de Galicia e o Concello de Santiago por RECICLOS, o Sistema de Devolución e Recompensa (SDR) que foi desenvolvido por Ecoembes, a organización ambiental sen ánimo de lucro que coordina a reciclaxe de envases en todo o país.
Deste xeito, Santiago de Compostela convértese na primeira cidade de Galicia en apostar por este sistema de reciclaxe que premia aos cidadáns recicladores con incentivos que axuden a mellorar a súa contorna máis próxima, mentres seguen fomentando a circularidad dos envases, é dicir, contribuíndo a darlles unha nova vida.
Así, os máis de 97.000 veciños e veciñas de Santiago poderán reciclar as súas latas e botellas de plástico de bebidas nun dos 599 colectores amarelos das rúas da localidade aos que se lles incorporou tecnoloxía e obter recompensas ao facelo. Entre estes incentivos destacan aqueles de carácter social cos que poder axudar á comunidade, tales como a contribución ao proxecto “Preto de ti vivir quero. Un barrio amable, Santa Marta”, un proxecto de recuperación de espazos verdes urbanos. Ademais, os cidadáns de Santiago tamén poden obter incentivos relacionados coa mobilidade sustentable, como participar nun sorteo para conseguir un patinete eléctrico.
A concelleira Mila Castro amosou a súa satisfacción pola iniciativa e salientou que “o Concello de Santiago sempre tivo un compromiso cos principios da economía circular e coa reciclaxe, por iso, ante a oportunidade de sumarnos a Reciclos, non o dubidadamos”.
Por parte da Xunta, Sagrario Pérez subliñou o acerto de elixir Santiago para implantar esta iniciativa xa que a súa veciñanza ten dado pasos importantes para avanzar no cumprimento das directivas europeas na materia. Así, subliñou que as taxas de recollida de envases lixeiros e papel e cartón nesta cidade están por riba da media galega.
Pola súa banda, o director de Xestión Local e Autonómica de Ecoembes, Ángel Hervella destacou que “os obxectivos en materia de reciclaxe marcados pola Unión Europea son cada vez máis ambiciosos e requiren dun gran esforzo por parte de todos. Por iso, desde Ecoembes queremos contribuír a afrontar este reto con solucións innovadoras, como é RECICLOS, que fomenta a circularidad dos envases e co que os cidadáns, ademais, poden contribuír a mellorar Santiago de Compostela a través das recompensas que obteñen ao reciclar”.
Para facer uso de RECICLOS, os cidadáns de Santiago só teñen que rexistrarse na webapp e, en casa, escanear o código de barras do envase que queren reciclar antes de tiralo ao cubo. Unha vez na rúa, cando acudan ao colector amarelo coa súa bolsa de envases, deben depositala nun colector amarelo e escanear o código QR que hai no colector. Ao facelo, obterán puntos, denominados RECICLOS, que poderán cambiar polas distintas recompensas que teñan dispoñibles. Estes puntos terán un límite semanal co fin de que os cidadáns non só reciclen máis e mellor os seus envases, senón que consuman de forma responsable.
Ademais, durante a primeira semana de maio, despregaranse accións a pé de rúa destinadas a que os cidadáns de Santiago infórmense sobre RECICLOS e poidan resolver todas as súas dúbidas.
Acondicionamento de espazo verde en Santa Marta
Cos primeiros incentivos resultantes do programa, o Concello acondicionará un espazo verde no barrio de Santa Marta para o seu uso e disfrute pola cidadanía.
Crearase unha zona de estancia con mesas e bancos, empregando un sistema con módulos de 36m2 que facilita escalar a proposta a outras zonas verdes.
Serán dous módulos, un con mesa e árbore, formado por pavimento de madeira, unha mesa con bancos, un borde con plantacións arbustivas e unha árbore de porte grande para dar sombra; e un módulo con bancos e pérgola, formado por pavimentos de madeira, bancos corridos, un borde con plantacións arbustivas e unha pérgola para dar sombra.
