Os axentes impuxeron proposta de sanción as dúas persoas responsables da captura debido a que a maioría dos exemplares non acadaban o talle mínimo esixido pola normativa
A Policía Autonómica vén de identificar a dúas persoas que nas redes sociais difundiron imaxes da captura de 143 troitas sen respectar os talles permitidos.
Axentes da xefatura da Policía Autonómica en Santiago de Compostela iniciaron a investigación tras ter coñecemento o pasado 10 de abril, a través de multitude de denuncias anónimas , da difusión dun vídeo nas redes sociais, na que se observa a unha persoa collendo troitas nun lavadoiro, mentres que a que realiza a gravación as vai contando ata acadar a cifra de 143. O vídeo tivo repercusión a nivel nacional tanto nas distintas redes sociais como en medios especializados neste ámbito.
Tras as pescudas realizadas, a Policía Autonómica esclareceu a autoría das persoas autoras do vídeo procedentes do lugar de Sigüeiro do concello coruñés de Oroso, ás que se lles tomou declaración e que recoñeceron ser responsables da captura de 143 troitas en ríos da provincia da Coruña. Tendo en conta que a maioría dos exemplares non acadaban o talle mínimo esixido, os axentes propuxeron a ambos para sanción ante a Xefatura Territorial da Consellería de Medio Ambiente, Territorio e Vivenda da Coruña.
