O Concello prestará a súa colaboración aos mozos que queiran realizar actividades ou crear asociacións, así como orientación legal sobre temas de carácter xurídico e dereitos da xuventude
O concelleiro de Educación, Deportes e Xuventude, Francisco Mourelo, anunciou esta mañá os novos servizos de asesoramento que se poñen
a disposición dos mozos coruñeses, así como a nova edición do Plano Xuvenil de
A Coruña. Todas estas iniciativas preséntanse coincidindo co XXV aniversario do Centro Municipal de Información Xuvenil (CMIX).
O Centro Municipal de Información Xuvenil converteuse nun referente para a sociedade coruñesa e, de xeito especial, para os máis novos durante os últimos 25 anos. Tal día como hoxe, hai 25 anos, abriuse ao público o CMIX, dependente da Concellaría de Xuventude. Para dar máis valor a este feito, o Goberno municipal decidiu poñer en marcha dous novos servizos para impulsar e potenciar a atención que se ofrece aos mozos a través do CMIX. En concreto, empezaranse a prestar dous novos servizos de asesoramento para iniciativas xuvenís e para orientación legal.
SERVIZO DE ASESORAMENTO DE INICIATIVAS XUVENÍS
O CMIX ofrece un servizo de asesoramento integral a asociacións e grupos non formais de mozos. Deste xeito, o Centro Municipal de Información Xuvenil poderá cumprir unha serie de obxectivos e responder ás demandas máis solicitadas polas entidades, como asesoramento na creación de asociacións, difusión das actividades realizadas, apoio á realización destas e cesión de espazos para realizalas. Francisco Mourelo, acompañado do coordinador do CMIX, Óscar Castro, detallou os principais obxectivos que se queren conseguir con este novo servizo:
. Apoiar durante o proceso de creación dunha asociación.
. Informar sobre axudas, subvencións e a forma de realizar a solicitude destas convocatorias.
. Difundir polas súas canles as iniciativas de interese xuvenil realizadas por entidades desta natureza.
. Ceder espazos no Fórum Metropolitano a entidades xuvenís ou colectivos que realicen eventos de interese xuvenil e que non teñan ánimo de lucro. Estes espazos poderán solicitarse no propio CMIX.
SERVIZO DE ORIENTACIÓN LEGAL
Destinado aos mozos, en horario de luns a xoves de 17.00 a 20.00 horas, este servizo estará atendido por unha licenciada en Dereito e terá como obxectivo informar de forma personalizada e gratuíta sobre diversos temas de ámbito xurídico que afectan habitualmente ás persoas novas, como dereitos da xuventude, como facer un recurso ou unha reclamación, ou temas relacionados coa vivenda.
PLANO XUVENIL
Co obxectivo de que os mozos coruñeses e visitantes coñezan os centros e recursos (educativos, culturais, sociais e laborais) que a cidade pode ofrecelos, o concelleiro de Xuventude tamén anunciou que o CMIX publica 25.000 exemplares do Plano Xuvenil de
A Coruña. Con esta reedición do plano infórmase sobre as posibilidades que en diversas áreas ofrece a cidade e, ao mesmo tempo, fomenta a creación dunha cidadanía máis activa entre os mozos.
Ademais, crea unha web para que este plano poida ser consultado en internet, www.coruna.es/planoxuvenil, polo que deste xeito tamén se ofrece un novo servizo, moi demandado polos mozos da cidade, centros educativos e diversas entidades.
Para máis información sobre estes novos servizos, os cidadáns pódense poñer en contacto co Centro Municipal de Información Xuvenil, no Fórum Metropolitano (cale Río Monelos, teléfono 981 184 294, correo electrónico cmix@coruna.es e páxina webwww.coruna.es/nex), en horario de luns a venres de 10.00 a 14.00 e de 17.00 a 20.00 horas e os sábados, de 11.00 a 14.00 horas.
BALANCE
O concelleiro de Xuventude destacou que estas novas iniciativas se suman a un amplo abano de servizos que ofrece o CMIX e que permitiron mellorar as cifras do centro nos últimos catro anos. Así, o ano pasado, o Centro Municipal de Información Xuvenil superou os 100.000 visitantes á súa sede do Fórum e os 1,3 millóns de páxinas vistas na súa web.
Entre 2011 e 2014, o Centro Municipal de Información Xuvenil incrementou os seus visitantes en 8.890, un 8,7% máis (de 93.307 a 102.297); o seu número de consultas asistidas en 5.535, un 25% (de 16.606 a 22.141); de visitas á web do CMIX en 174.950, un 35,5% (de 316.784 a 491.734); e o número de páxinas vistas en 366.275, un 27,2% máis (de 976.923 a 1.343.198).
