No día de onte iniciáronse os traballos de limpeza do leito no tramo do río Morto (antes da estrada) e do río das Xunqueiras (dende a estrada xeral cara ao C.E.P. Salustiano Rey Eiras). Ata o lugar desprazáronse nesta mesma mañá o alcalde, Xosé Lois Piñeiro (Nós Pobra), e a concelleira dos Servizos Municipais, Estefanía Ramos (Nós Pobra).
A edil explicou que as tarefas terán continuidade nos vindeiros días e inclúen a limpeza de vexetación que invadían o leito do río, así como a xestión dos residuos vexetais que, nalgúns casos, son alóctonos, polo cal “hai que xestionalo da maneira adecuada”. A empresa que está realizando estes labores é Tragsa,
por un importe de 15 415 euros con cargo aos orzamentos municipais.
Na súa intervención, o rexedor manifestou que se trata dunha zona recoñecida como ARI (área de risco de inundacións). Así mesmo, engadiu que a colmatación, é dicir, o depósito de sedimentos que se produce ano tras ano, favorece o crecemento da vexetación e dificulta o paso da auga, razón pola cal resultou preciso realiza-la referida intervención para garanti-la seguridade da cidadanía ante o perigo de asolagamentos. Tamén apuntou a que se valora, de cara a anos vindeiros, a posibilidade de retirar tamén o sedimento para mellora- la evacuación da auga fluvial. Ademais, o mandatario local sinalou que a actuación no acceso ao centro educativo procurou facerse coa maior dilixencia posible, mais expresou desculpas polas molestias ocasionadas.
