O Eixo Atlántico e a editorial La Capital promocionaron as distintas rutas xacobeas a través dunha guía turística e co sorteo de estadías en Portugal que hoxe entregaron na sede da firma
O concelleiro de Turismo, Juan Ignacio Borrego, participou esta mañá na entrega de premios organizados pola editorial La Capital e o Eixo Atlántico, en que as persoas agraciadas poderán desfrutar dun bono dunha fin de semana grazas á campaña “Un camiño de futuro”. O organismo co que colabora o Concello promoveu durante estes meses as distintas rutas xacobeas a través dunha guía que distribuíron a través dos xornais da firma e un concurso, en que as e os lectores tiveron que xuntar varios cupóns para o sorteo de estadías en Portugal.
Do mesmo xeito, o Eixo Atlántico estendeu a promoción ao país veciño co fin de que se produza un intercambio cultural e as persoas portuguesas premiadas desfruten dunha escapada en Galicia. O edil recordou o potencial que o Camiño de Santiago ten para unírmonos máis aínda con Portugal e explotarmos así as nosas fortalezas como un todo.
