Polo décimo aniversario do espazo, o Goberno local convoca o concurso “Éxito10”, en que impulsará tres proxectos que recibirán asesoramento e titorías nas áreas que máis o precisaren
Con motivo do décimo aniversario do Centro Municipal de Empresas de Agrela, o concello quere premiar novos proxectos empresariais a través dun concurso “Éxito10”, en que se lle dará acubillo neste espazo a dez emprendedoras e emprendedores. O prazo para se apuntar remata o 4 de decembro e único requirimento é que as iniciativas non cheguen aos dous anos de vida. Con este certame, o Goberno local pretende consolidar os proxectos no tempo para mellorar así o tecido empresarial do municipio. Deste xeito, tratará de facilitarlles o proceso de asentamento desas actividades que concibiron con formación, asesoramento e mentorización. Para participar no concurso, cómpre presentar unha solicitude a través da sede electrónica do concello e engadirlle un impreso de solicitude xeral coa descrición: “Proxecto CONCURSO ÉXITO10 (Servizo de Emprego e Empresa)”, o DNI, un anexo sobre o proxecto empresarial e un currículo das persoas inscritas.
Un comité especializado valorará cuestións como a demanda e as necesidades que cobre o produto, a previsión de vendas e a súa distribución. Ademais, terase en conta o seu carácter innovador e sustentable, así como o respecto á súa contorna natural e social e a contribución ao desenvolvemento tecnolóxico.
O 10 de decembro, daranse a coñecer as e os gañadores durante o acto de conmemoración do décimo aniversario. Repartiranse tres galardóns: o primeiro premio consistirá en seis meses de estadía gratuíta no Centro Municipal de Empresas de Agrela, un vídeo promocional e dez horas de mentorización ou titoría personalizada nas áreas de xestión que consideren máis necesarias.
O segundo premio serán catro meses de estadía gratuíta no centro e 8 horas de mentorización ou titoría personalizada e o terceiro premio suporá dous meses no local de Agrela e seis horas de asesoramento.
