Estas accións formativas, que pretenden potenciar a dixitalización, están deseñadas para persoas desempregadas, en situación de ERTE e profesionais, cuxos requisitos son ser maior de 16 anos e estar empadroado/a no Concello da Coruña
O Concello da Coruña presenta unha nova iniciativa de formación en liña para 2.700 residentes no municipio de forma totalmente gratuíta dentro do Plan de Reactivación Económica e Social da Coruña ( PRESCO). Dentro do eixe de medidas económicas, que figura no mencionado plan, para colectivos e tecido afectado pola parálise da actividade como consecuencia da Covid-19, inclúese a liña 7: programa de cualificación profesional, no que se inclúen varias edicións de 50 itinerarios formativos diferentes nos sectores e especialidades con máis oportunidades de emprego a través de formatos en liña.
Desde o Goberno de Inés Rey lembran que o concello destinou máis de 13 millóns de euros a reactivar a economía, “é o momento de estar preto da xente e das súas necesidades”, e sinala que para a liña de axudas do PRESCO ás persoas autónomas presentáronse 3.827 solicitudes por valor de 12 millóns de euros. Desde o Goberno local aseguran que A Coruña foi a primeira cidade de Galicia en dar unha resposta aos efectos económicos e sociais da pandemia asumindo a necesidade de responder independentemente das nosas competencias.
A concelleira de Innovación, Industria e Emprego e Consumo, Eva Martínez, sinala que “a situación actual na que nos atopamos propicia que debamos afrontar unha nova realidade e que a formación en liña pase a formar parte do presente para potenciar as nosas habilidades, crear un mellor perfil profesional e académico e xerar maiores probabilidades de contratación en futuros empregos”. Desde os nosos fogares, asegura a edila, “podemos continuar ampliando coñecementos sen necesidade de acudir a un centro de formación”.
O Concello da Coruña, a través da Concellería de Innovación, Industria, Emprego e Consumo, ofrece un catálogo de máis de 50 accións formativas en liña con varias edicións cada unha, en distintos sectores profesionais con máis de 2.700 prazas abertas. O prazo de inscrición publicitarase na páxina web https://www.coruna.gal/emprego/gl
Trátase dunha medida deseñada para persoas desempregadas, en situación de ERTE e profesionais. Os requisitos para realizar esta formación integramente en liña son ser maior de 16 anos e estar empadroado/a no Concello da Coruña.
Cada persoa poderá seleccionar unha acción formativa de calquera das áreas de especialización: idiomas (inglés, francés e alemán en distintos niveis), Microsoft Office (Word, Excel, Access, Power Point, Outlook básicos e avanzados), comercio e márketing (comercio electrónico, venda en liña, atención telefónica á clientela, satisfacción á clientela, manipulación de alimentos), administración de empresas (seguridade informática, firma dixital, notificacións e rexistros electrónicos, trámites en liña coa administración, comunicación, habilidades directivas…), informática (cloud computing, redes, maquetación dixital, impresión 3D, deseño gráfico, ArcGIS…) e prevención de riscos laborais (multisectorial, prevención da tensión laboral, prevención de riscos laborais en oficinas, no sector químico, emerxencias e evacuación…).
Todas as accións formativas implican competencias moi demandadas na dixitalización que está a experimentar o mercado actual. Estas estarán dispoñibles integramente en liña e accesibles na modalidade 24/7, é dicir, durante as 24 horas do día, calquera día da semana.
A información sobre esta formación en liña e as súas particularidades pódese consultar de forma detallada na web municipal www.coruna. gal/emprego/gl .
