A licitación do contrato sairá nas próximas semanas, pero non impedirá que sigan prestando o servizo. Empezarán as actividades agás as da piscina de Riazor debido ás obras de renovación da súa cuberta
O Concello da Coruña confirma que as Escolas Deportivas municipais comezarán a súa actividade a principios de outubro como veñen facendo todos os anos, aínda que haberá actividades que polas restricións decretadas pola Xunta de Galicia ou por obras nas infraestruturas, como no caso da Piscina de Riazor, non se poidan levar a cabo.
De feito, a Concellería de Deportes presentou as bases da convocatoria das renovacións das matrículas nas Escolas Deportivas Municipais no mes de xullo, en que se rexistraron un total de 1.380 solicitudes.
As prazas da escola de natación ofertaranse unha vez que termine a obra da cuberta da piscina de Riazor a finais de ano. A concelleira de Deportes, Mónica Martínez, anunciou que se sacará unha nova oferta de prazas a finais deste mes para completar a capacidade dos grupos das escolas municipais.
A edila explicou hoxe na comisión de Deportes que as actividades das Escolas Municipais Deportivas manteranse coas restricións que decretou a Xunta de Galicia e que por tanto aquelas actividades que, pola súa complexidade ou número de participantes, non cumpran con estes requisitos sanitarios non se poderán ofertar polo momento.
Con respecto á licitación do contrato de xestión das Escolas Municipais Deportivas, Martínez sinalou que en xuño xa se anunciou na plataforma de licitación o concurso público e que nas próximas semanas sairá a licitación o novo contrato que mellorará a prestación das actividades actuais e as condicións laborais das e dos traballadores deste servizo esencial para o Concello.
