Avanzan os traballos para ampliar a beirarrúa no tramo entre a avenida de Rubine e a rúa Modesto Goicouría
Unha vez implantado o carril 30 no Paseo Marítimo, o concello continúa cos traballos de ampliación e mellora da seguridade viaria na avenida Pedro Barrié de la Maza entre a avenida de Rubine e a rúa Modesto Goicouría e na rúa Vía Ártabra, en Monte Alto. As actuacións, que se enmarcan no Plan de mobilidade sustentable, avanzan a bo ritmo, nunha aposta clara por gañar espazos públicos de calidade, segundo afirma a alcaldesa, Inés Rey. No caso de Pedro Barrié de la Maza, a actuación consiste en duplicar a superficie de beirarrúa existente tras ocupar o carril de circulación máis próximo aos edificios. Ademais, reordenarase a sinalización horizontal para deixar dous carrís por sentido de circulación. O prazo de execución é de dous meses e conta cun orzamento de 33.574,66 euros.
Doutra banda, a Concellería de Infraestruturas continúa coas obras na rúa Vía Ártabra en que se construirá unha plataforma única e unha praza na rolda de Monte Alto. Neste aspecto, ampliáronse as beirarrúas, que se pavimentarán con outro tipo de formigón. Tamén se plantarán árbores e levaranse a cabo melloras na contorna do colexio Víctor López Seoane. Os traballos teñen unha partida orzamentaria de 247.000 euros.
