A Concellería de Urbanismo, Infraestruturas e Mobilidade está a realizar diversas actuacións na rede de saneamento como na rúa Venecia, cunha inversión de 211.000 euros, en Alexander Von Humboldt, Xeneral Rubín e San Pedro de Mezonzo, e “executa este tipo de labores de forma constante e desde o comezo do mandato”
A Concellería de Urbanismo, Infraestruturas e Mobilidade está a realizar diversas actuacións na rede de saneamento da cidade co obxectivo de levar a cabo un mantemento óptimo nesta infraestrutura urbana fundamental para a correcta condución das augas residuais e o seu correspondente tratamento. Na rúa Venecia, as obras de saneamento separativo contan cun orzamento municipal de 211.000 euros e está previsto que se rematen a mediados de setembro.
Pola súa banda, a concellería tamén realiza labores de mantemento na rede de saneamento pola rotura de colectores nas rúas Alexander Von Humboldt, Xeneral Rubín e San Pedro de Mezonzo. Nas dúas últimas actuacións os traballos de mantemento nos saneamentos van moi avanzados e se prevé que rematen en dúas semanas.
Segundo o concelleiro de Urbanismo, Infraestruturas e Mobilidade, Juan Díaz Villoslada, “o compromiso da nosa alcaldesa, Inés Rey, para ter cuberto o mantemento desta infraestrutura na cidade é firme”, e asegura que “o Goberno local executa actuacións na rede de saneamento de todos os barrios de forma constante e desde o comezo do mandato”.
Desde Infraestruturas sinalan que proximamente acometerán traballos de mellora no saneamento da zona da Agra do Foxo, en Eirís.
