A concelleira de Benestar Social, Yoya Neira, agradécelle á entidade Abanca que se faga cargo do financiamento destas axudas durante o período estival co fin de axudar as familias con máis necesidades económicas da cidade
Preto de 500 nenas e nenos reciben este verán as bolsas comedor que oferta Benestar Social, despois de que o concello decidira estender estas axudas ao período estival para axudar as familias máis vulnerables.
En concreto, os menús destes meses de vacacións estarán financiados por Abanca, a través da súa obra social Afundación, á que a concelleira Yoya Neira lle quixo agradecer a súa sensibilidade por contribuír a que a veciñanza con máis necesidades económicas poida afrontar mellor esta tempada de incerteza. Deste xeito, Benestar Social non suspendeu as bolsas comedor durante o estado de alarma, aínda que non houbo colexio nin tampouco o fixo en Semana Santa nin nos días festivos.
A entidade financeira proporcionaralles 80.000 menús saudables e nutritivos ás e aos escolares galegos dentro do programa “Cubertos”, dos que 1.650 se repartirán até o inicio do curso co obxectivo de apoiar a infancia en risco de pobreza ou exclusión social, cuxa situación se viu agravada pola crise da COVID-19.
