Santiago de Compostela é o destino con maior número de establecementos e servizos distinguidos co recoñecemento “Preparados Covid”, que garante o estrito cumprimento das Boas Prácticas Avanzadas do Sistema Integral de Calidade Turística en Destino (SICTED) para a redución do risco de contaxio no sector turístico, segundo apuntou o concelleiro de Turismo, Sindo Guinarte, nunha rolda de prensa na que estivo acompañado pola xerente de Turismo de Santiago, Flavia Ramil.
A Secretaría de Estado de Turismo, a través do proxecto SICTED, apoia as empresas e entidades turísticas participantes durante o seu proceso de adaptación para a volta á normalidade tras a crise sanitaria provocada pola Covid-19. Por este motivo, creáronse as Boas Prácticas Avanzadas SICTED para a redución do risco de contaxio no sector turístico.
Os establecementos distinguidos a partires deste proceso como “Preparados Covid” son aqueles que implantaron os protocolos definidos nas Boas Prácticas Avanzadas e superaron unha avaliación externa que garante o seu estrito cumprimento, ofrecendo aos seus clientes un servizo máis controlado e seguro dende o punto de vista sanitario.
Nos pasados meses, Turismo de Santiago organizou múltiples videoconferencias para explicar ao sector cada un dos novos requisitos. Tamén trasladou documentación a modo de exemplo para que os establecementos e servizos puidesen adaptarse ás esixencias da nova realidade.
O 9 de xullo, tras someterse as avaliacións externas precisas, Turismo de Santiago enviou ao Comité Extraordinario do SICTED para a Covid-19 a 37 empresas e servizos da cidade. Todas elas conseguiron a distinción “Preparados Covid”, convertendo a Santiago no destino con maior número de distincións deste tipo que garanten que os establecementos e servizos seguen todos os protocolos para a redución do risco de contaxios, tanto entre os seus clientes como entre o seu persoal.
Aos establecementos distinguidos neste ciclo Covid-19 envióuselles o diploma e o logo correspondente, no que figura un código QR que, ao escanealo, nos conduce á páxina do SICTED, www.calidadendestino.es, onde consta a información do establecemento ou servizo e a súa condición de “Preparado para Covid-19”.
Entre os 37 establecementos e servizos distinguidos como “Preparado Covid” atópanse tres aloxamentos rurais, cinco restaurantes, un transporte turístico, dúas oficinas de turismo, dez hoteis e apartamentos turísticos, sete guías oficiais, unha axencia de viaxes e oito comercios.
