Cariño pavimentará e renovará a rede de abastecemento e pluviais nos camiños de Campanario, Murela e Fontao

O goberno local destina preto de 60.000 euros para este proxecto.
O Concello de Cariño acaba de sacar a licitación o proxecto para pavimentar os camiños de Campanario, Murela e Fontao. Unha actuación valorada en 58.774,14 euros, financiada a través do Plan Único da Deputación dá Coruña, que tamén permitirá renovar a rede de abastecemento e pluviais nestes puntos.
Os traballos nestes camiños consistirán na substitución dun tramo de tubaxe de abastecemento nos camiños de Campanario e Fontao, a mellora puntual da rede de pluviais no inicio do camiño de Campanario no entroncamento co camiño da Corredoira e, por último, a extensión dunha nova capa de aglomerado asfáltico nas tres vías obxecto de actuación, que suman en total 1,2 quilómetros.
O ano pasado o goberno local reuniuse cos veciños da parroquia da Pedra para coñecer as súas necesidades, entre as que se atopaban as obras que se acometerán con este proxecto na zona de Murela. Esta actuación permitirá rebaixar 12 centímetros a altura da actual calzada, facilitando o paso a varias vivendas do núcleo que actualmente teñen dificultades de acceso debido ao alto desnivel da estrada. Ademais, tamén se realizará o hormigonado da cuneta principal para así poder levar limpas as augas pluviais directamente ao río Murela.
O alcalde de Cariño, José Miguel Alonso Pumar, destacou a necesidade de “renovar o pavimento nestes camiños, moi transitados xa que dan servizo a estes núcleos da parroquia da Pedra” e que “permitirán tamén mellorar o servizo de auga potable e de recollida de pluviais aos veciños e veciñas da zona”.
O prazo para a presentación de solicitudes finaliza o 22 de xullo e o tempo estimado de execución dos traballos é de tres meses.