As persoas usuarias dos diferentes servizos poden solicitar e xestionar as súas citas, así como coñeceren os tempos de espera á súa chegada ás distintas oficinas municipais desde a web do concello ou polo móbil
A causa da situación creada pola pandemia da Covid-19, e co fin de lle garantir a mellor atención posible á cidadanía, o Concello da Coruña, a través da Concellería de Economía, Facenda e Réxime Interior, pon en marcha un novo sistema de cita previa e de xestión de citas para lles facilitar ás persoas a súa relación cos distintos servizos da Administración local. A actuación enmárcase dentro da estratexia de transformación dixital deseñada polo goberno, adiantándose á súa implantación por mor das circunstancias actuais. “Esta é a primeira de moitas iniciativas de modernización tecnolóxica que poremos en marcha neste mandato”, dixo o concelleiro de Econonía, Facenda e Réxime Interior, José Manuel Lage Tuñas.
O pasado 18 de maio o concello retomou a atención presencial ás e aos cidadáns e realizouna aplicando todos os protocolos de seguridade para garantir a saúde das e dos usuarios e do persoal traballador. Co fin de minimizar as molestias e de poder manter a calidade dos servizos instaurouse un sistema de cita de previa que lle facilita á veciñanza concertar a súa cita co servizo que precise mediante diferentes
canles.
Desde hai un mes pódense pedir citas a través da páxina web municipal e tamén a través do 010. Agora, ademais, é posible facelo mediante un novo programa, incluído tamén na web municipal, que non precisa descargas e que se pode xestionar desde o teléfono móbil. O programa permite non só solicitar a cita escollendo entre os horarios dispoñibles, senón tamén xestionar e cambiar ditas citas de xeito telemático cando xorde algún imprevisto. Así mesmo, é posible tamén formalizar a cita chamando ao número de teléfono 881 50 51 01. O concello leva xestionadas máis de 7.600 citas desde que se reactivou a atención presencial.
O novo sistema de cita previa permítelle á cidadanía que ten reservado día e hora confirmar a súa chegada ás dependencias municipais mediante a lectura dun código QR situado na entrada das distintas oficinas. O código facilítalle ás persoas usuarias o tempo que lles resta antes de seren atendidas.
Máis aló do novo programa, nos rexistros municipais ubicáronse máquinas dispensadoras de tíckets e pantallas con información sobre as quendas de espera. A recepción das e dos cidadáns está organizada polo persoal municipal (conectado co novo sistema a través dunha tableta) que atende na porta, imprime os tíckets e organiza as entradas de cara a garantir a seguridade nos diferentes centros.
“Fixemos un esforzo por conciliar a atención ás e aos cidadáns coas necesarias medidas de seguridade. O goberno que preside Inés Rey estableceu como prioriade a mellora dos servizos á veciñanza desta cidade. A modernización pasa por facerlle a vida máis fácil, por achegarlle servizos e abrirlle as portas do concello desde a súa casa”, indicou o concelleiro, que recordou que o Presco recolle tamén preto dun millón de euros de orzamento para a transformación dixital do concello.
O novo servizo está dispoñible nos catro rexistros e centros de atención cidadá de María Pita, Centro Ágora, Fórum Metropolitano e A Franxa e no vindeiro mes estenderase, entre outras, ás áreas de Urbanismo, Benestar Social e Deportes. Ademais, tamén é posible reservar xa desde a web hora e día para atención persoal nas oficinas de Urbanismo e Mobilidade.
Nos catro rexistros instaláronse mamparas para garantir a separación (11 na Franxa, 11 en María Pita, 4 no Centro Ágora e 3 no Fórum Metropolitano), así como dispensadores de hidroxel e sinalética no chan para manter as distancias e dirixir o tránsito polo interior dos locais.
Do mesmo xeito, o concello tamén instalou outras 157 mamparas de separación repartidas entre os centros cívicos, bibliotecas, servizos administrativos e dependencias da Policía Local, lugares en que tamén existen dispensadores de hidroxel.
