Desde un primeiro momento esta actuación proxectouse acordando o anteproxecto coas demandas dos veciños e veciñas da zona.
O Concello de Cariño acaba de sacar a licitación a urbanización da rúa de Ou Cadro, o barrio con máis poboación da parroquia da Pedra. Esta actuación, que supoñerá unha reurbanización integral da vía, conta cun orzamento de 126.000 euros.
Este proxecto foi totalmente participativo xa que se acordou o anteproxecto coas demandas dos veciños e veciñas da zona. En febreiro de 2019 o goberno local reuniuse cos veciños e veciñas da rúa de Ou Cadro así como coa asociación de veciños da Pedra para ofrecerlles diferentes alternativas de urbanización
da vía. A decisión xurdida deste encontro foi que a vía se habilitase en sentido único, xa que o ancho actual non é suficiente para facela de dobre sentido e ademais incluír beirarrúas e aparcamento.
A actuación consistirá na demolición do actual firme, en rega asfáltico, que será mellorado por unha capa de aglomerado. Despois, instalaranse beirarrúas a ambos os dous lados da vía para mellorar a seguridade peonil e, por último sinalizarase a zona creando espazo para o aparcamento a un dos lados e colocarase mobiliario urbano como bancos e papeleiras. Aproveitarase tamén a obra para mellorar os
servizos de iluminación, saneamento e pluviais.
O alcalde, José Miguel Alonso Pumar, explica que “desde un primeiro momento non nos conformamos cun simple asfaltado xa que esa rúa, que concentra o maior número de veciños da parroquia da Pedra, necesita unha actuación máis ambiciosa como é a urbanización que se expón, que inclúe rebaixar o nivel do firme, o posterior asfaltado e a creación de beirarrúas, coas que non conta agora mesmo”.
O prazo para a presentación de ofertas finaliza o 22 de xuño e o tempo estimado de execución dos traballos é de 4 meses desde o seu inicio.
