A concelleira Yoya Neira sinalou que a ferramenta permitirá coñecer o impacto das políticas a medio e longo prazo a través de datos sobre a realidade coruñesa
A concelleira de Benestar Social, Yoya Neira, presentou esta mañá o Observatorio Urbano da Coruña, unha nova ferramenta de traballo que permitirá a planificación estratéxica da cidade para lles facer fronte ás consecuencias económicas e sociais desta pandemia. O mecanismo abordará cuestións ambientais, sociais, de mobilidade ou de acceso á vivenda, entre outras, tanto no deseño como na súa avaliación posterior. A edila explicou que se fará con el un seguimento para determinar o grao e o ritmo de execución dos distintos plans que se porán en marcha nunha aposta por adaptar o sistema á realidade actual e aproveitar a xeración de resiliencia social na etapa máis dura desta crise. Polo
momento, o concello ten activados 142 indicadores e está á espera de incluír 200 máis co fin de obter unha fotografía clara e precisa da situación coruñesa. Nesta primeira fase do proxecto están expostos os datos en PDF na páxina web do concello https://www.coruna.gal/agendaurbana/es/indicadores-urbanos/observatorio- urbano-de-a-coruna?argIdioma=es. Nas vindeiras semanas engadirase a mesma información en formato excel, e nunha terceira fase, publicarase tamén en formato aberto (open data) para traballar cos datos co fin de construír, na cuarta fase, o observatorio de sustentabilidade urbana que integrará diferentes fontes de indicadores como os da Axenda 2030, NAU-Hábitat III, Comisión Europea ou os da Axenda Urbana Española.
Por último, Neira explicou que crearán unha web exclusiva do Observatorio de Sustentabilidade Urbana, que integrará todos os aspectos da de igualdade e da diversidade: “Os obxectivos están en poder medir a situación da cidade, lonxe de valoracións subxectivas e utilizarmos os datos para xerar informes e consultas e que teñamos información actualizada atendendo aos diferentes perfís”. Aclarou que a planificación das políticas será a medio e longo prazo, de xeito que se poida comprobar se con elas se acada o impacto desexado en función das cifras demográficas, da xestión da auga e dos residuos, de transporte ou de mobilidade, “como o número de vehículos por cada 1000 habitantes, prazas de aparcamento, intensidade do tráfico, de accesos e saídas; de emprego, vivenda, educación, sanidade, cultura, participación cidadá….”.
En concreto, dentro da Área de Benestar Social, a edila comentou que manexan ítems que lles permitirán realizar o mapa de inclusión anunciado para coñecer o perfil que hai detrás das axudas por barrios, sexo, idade e nacionalidade e dar así a resposta máis axeitada. Do mesmo modo, contabilizarán a demanda de prazas nas residencias da terceira idade e nos centros de día e cruzarán datos relacionados coa violencia de xénero: “Atopámonos no punto de partida dun observatorio polo que teñen que avanzar as cidades modernas e sustentables”, que xorde da necesidade de deseñar un novo instrumento de xestión social, que no seu desenvolvemento terá financiación no marco de EidusCoruña, financiado nun 80% polo Fondo Europeo de Desenvolvemento Rexional (Feder) no marco do eixo de desenvolvemento urbano do Programa Operativo Plurirrexional de España (POPE) 2014-2020, xunto co programa Coruña Suma financiado polo FSE (Fondo Social Europeo), entre outros. Neira recalcou que os datos responden a series temporais de 20 anos, desde o 2000, e que a novidade permitirá saber como a COVID-19
afecta a determinadas tendencias.
Desde o concello comprométense a elaborar políticas que “nos axuden a superar o antes posible as consecuencias deste estado de alarma” desde a cooperación e corresponsabilidade de todas as institucións, entidades e da veciñanza da Coruña e mais da área metropolitana. A concelleira explicou que o Goberno local propón un método de traballo colaborativo para ser realizado pola totalidade de sectores públicos e privados que interveñen na cidade e que buscan un desenvolvemento equitativo, xusto e sustentable desde os distintos campos de actuación. Cómpre resolver os problemas persistentes durante anos e tamén os que aparecerán tras a COVID-19 co fin de conseguirmos prestar máis e mellores servizos a un custo razoable e artellarmos este territorio de forma integral.
