O documento de medidas económicas que está ultimando o Concello de Santiago para facer fronte á situación derivada do coronavirus, denominado Compostela Móvese 2020 COVID-19 contempla, entre outras medidas, impulsar unha liña de formación e consultoría para o asesoramento empresarial de cara a apoiar ás empresas na elaboración dos seus plans de reactivación económica, unha liña de subvención de xuros destinada a autónomos e PEMES e a creación dun Comité Económico de Crise. Segundo explica o alcalde de Santiago, Xosé Sánchez Bugallo, trátase dun programa de reactivación económica, que abrangue diferentes ámbitos e sectores empresariais, que “nos permitirá”, di, “saír da crise sanitaria coa maior normalidade posible”.
Son medidas deseñadas para un contexto de crise que na nosa cidade afecta a todos os sectores: comercio, hostalería, sector cultural, industria, etc. Sectores que precisan de axudas concretas e de impulso para, unha vez remate o período de confinamento, se incorporen ao mercado económico con garantías de éxito. Como axente económico local, o Concello ten que manter un difícil equilibrio: adoptar políticas de reactivación económica de consenso que mobilicen recursos propios e xeren confianza na recuperación entre os axentes económicos e, ao mesmo tempo, non contraer gasto a maiores, e se é posible expandilo. Por iso, dende a area de Promoción Económica traballan reprogramando actividades; priorizando partidas que beneficien aos colectivos máis afectados, como familias, autónomos e empresas locais; e empregando, sempre que sexa posible, provedores locais.
Formación e consultoría
O documento contempla a creación dunha liña de formación e consultoría online para o asesoramento empresarial, de cara a apoiar ás empresas na elaboración dos seus plans de reactivación económica. Cun orzamento inicial de 30.000 euros, abordaría a elaboración de plans de reactivación económica da man de persoal consultor especializado en sectores considerados estratéxicos. O obxectivo é facilitar a adaptación de 50 empresas de Compostela á situación xerada pola crise sanitaria; e elaborar guías de recomendacións sectoriais con iniciativas e boas prácticas que poidan ser aplicadas polo conxunto do tecido empresarial. Explica o alcalde que se habilitará “un paquete de contratos con diferentes asesorías da cidade, nas que contrataremos un número de horas, para que aquelas empresas que precisen unha atención máis especializada a poidan ter de xeito gratuíto”.
Axudas
Outra das medidas económicas é un programa de subvencións aos gastos de créditos, que beneficiaría sobre todo ao pequeno comercio e que, en principio, contaría cun orzamento de 100.000 euros, dispoñibles no orzamento de 2020. O obxectivo do Goberno local é ampliar esta liña de axudas tanto a autónomos como a PEMES. Explica Sánchez Bugallo que se trataría “da apertura dunha liña de subvencións para o pago de xuros”. Unha liña complementaria das propostas que se derivan da Xunta de Galicia e do ICO (Instituto de Crédito Oficial), que permitirían “pagar todo ou unha parte deses xuros derivados dos créditos contraídos por autónomos e pequenas empresas”.
Asesoramento
No marco do convenio coa Cámara de Comercio de Santiago de Compostela ofrecerase de xeito coordinado información e recursos para o acceso das empresas de Compostela ás liñas de financiamento ICO, ás xestionadas pola rede cameral, e outras fontes de crédito mobilizadas dende o Goberno e as propias entidades financeiras para o mesmo fin. Aos 50.000 euros contemplados no actual convenio, súmanse outros 50.000 adicionais. Este servizo de asesoramento, segundo explicaba o alcalde, será gratuíto.
Tamén se mantén o convenio previsto coa Asociación Área Empresarial do Tambre para accións relacionadas co Pacto pola Reindustrialización de Compostela; así como as accións previstas no marco da execución da EDUSI Revive Compostela, por un importe de 50.000 euros.
Outras medidas
No marco deste documento, tamén está prevista a creación do Comité Económico de Crise. O seu obxectivo é realizar un seguimento das medidas extraordinarias impulsadas polas distintas administracións. Ademais do persoal do Concello, o borrador contempla a incorporación a este comité de persoal académico da rede universitaria galega, e a participación das principais institucións económicas da cidade. Encargaríase do co-deseño das políticas económicas a implantar polo Concello de Santiago e a coordinación de actividades con estas entidades; e contaría cun orzamento inicial de 20.000 euros. Entre os traballos a realizar figuran:
● A elaboración dun estudo de impacto económico local da crise do COVID19 para a área económica de Santiago de Compostela.
● O asesoramento técnico ao Comité Económico de Crise no deseño de medidas de
reactivación económica a medio e longo prazo.
● Programación de xornadas temáticas informativas en colaboración coas institucións incorporadas a este comité, para dar información ao tecido económico sobre os recursos públicos ao seu alcance e as experiencias de boas prácticas identificadas e facilitar a aprendizaxe e toma de decisións dos axentes.
Tamén está previsto crear unha estrutura de xestión e coordinación dos recursos dedicados a comunicar e apoiar a tramitación de solicitudes de todos os programas de axudas a empresas derivados das medidas económicas extraordinarias creadas polo Goberno de España e a Xunta de Galicia. Para conseguir este obxectivo reformularanse os estatutos e composición de capital da sociedade UNINOVA, da que o Concello de Santiago forma parte xunto coa USC; e reforzarase a súa programación coa execución das actividades que se deseñen no Comité Económico de Crise.
Por outra banda, o documento contempla adiar a II Feira de Mulleres Emprendedoras de Compostela ao outono, reformulando o contido formativo e de debate da mesma para avaliar o impacto da crise do COVID-19 nas empresas de economía social e nos proxectos de emprendemento promovidos por mulleres. Prestarase especial atención á reflexión sobre o impacto económico nas persoas coidadoras, que neste período están asumindo unha especial carga de traballo.
Explica Sánchez Bugallo que o actual contexto obriga a reprogramar as accións económicas previstas para este ano. “O orzamento entrou en vigor onte, polo tanto podemos dispor das cantidades previstas no presuposto, pero ao mesmo tempo abrimos, a través de créditos ampliables, un escenario no que se poidan contemplar alternativas que non estaban inicialmente previstas. Esperamos que estas actividades se poidan levar as cabo a través de modificacións orzamentarias de crédito ou a través do superávit do propio Concello” , engade.
