Máis de 100 figurantes participarán na cita, na que tamén haberá un Belén vivente. Entregaranse agasallos e caramelos aptos para celíacos e diabéticos
Un ano máis a vila de Ordes prepárase para recibir a visita de Melchor, Gaspar e Baltasar nunha xornada marcada pola ilusión e a emoción dos máis novos. A tradicional cabalgata terá lugar o vindeiro luns a partir das 17 horas, momento na que está prevista a chegada das SSMM Os Reis Magos de Oriente en carruaxes tiradas por ponis e escoltadas por membros da súa garda persoal. Serán máis de 30 lanceiros, moitos dos cales acudirán a lombos dos seus cabalos.
Para unha ocasión tan especial o Concello conta coa participación e colaboración de máis de 100 figurantes entre pastoriños, anxos e moitos máis personaxes. Eles serán os encargados de ir repartindo dende as súas carruaxes especialmente engalanadas para a ocasión caramelos aptos para celíacos e diabéticos.
O programa previsto inclúe a benvida ás SSMM por parte do alcalde, Manuel Regos, e dos demais membros do seu equipo de goberno. Inmediatamente visitarán o gran Belén vivente na carpa especialmente instalada para a ocasión na Alameda. Alí agardaranlles escenas típicas, oficios tradicionais como ferreiros, panadeiros, labregos etc. Tamén haberá currais con animais exóticos, aves e gando como porcos, burros, galiñas, coellos, cisnes, cabras, canguros ou pavos reais entre outros. Os pastoriños e pastoriñas interpretarán un repertorio composto de panxoliñas e cancións propias desta época do ano, mentres Melchor, Gaspar e Baltasar farán entrega dos seus presentes a San Xosé, á Virxe María e ao neno Xesús. Posteriormente recibirán individualmente a cada neno e nena, que poderán lembrarlles os agasallos que pediron este ano ou, no caso de non telo feito aínda, entregarlles as súas cartas ademais de fotografarse con eles.
Para levar a cabo esta cita tan importante, sobre todo para os máis novos, contarase tamén coa colaboración dun amplo número de persoas que brindan o seu esforzo de maneira altruísta. Grazas a todos eles, así como a diversas firmas comerciais, asociacións e establecementos da zona, Ordes celebrará novamente a cabalgata máis importante de toda a comarca, que o ano pasado congregou arredor de 5.000 asistentes.
Corte de tráfico
Para o correcto desenvolvemento do acto e para que todos e todas poidan darlles a benvida aos Reis Magos tal e como merecen, a Policía Local cortará o tráfico na rúa Alfonso Senra dende as 16 ata as 21 horas. Os vehículos en dirección á Coruña desviaranse polas rúas Lagartos, Galicia e Rolda Leste, mentres que os que vaian cara a Santiago terán que circular polas rúas Rosalía de Castro, Lagartos e pola Rolda Leste.
