O edil de Urbanismo participou na inauguración do FORO Circuíto ANEER, que tivo lugar esta mañá no Centro Ágora e que ten como fin achegarlles ás persoas usuarias as claves da rehabilitación eficiente
O concelleiro de Urbanismo, Infraestruturas, Mobilidade e Vivenda, Juan Díaz Villoslada, participou no acto inaugural do Foro Circuíto ANERR da Rehabilitación Eficiente, que tivo lugar esta mañá no Centro Ágora e no que tamén interviñeron o presidente de ANERR, Fernando Prieto, o director xeral de Vivenda e Solo do Ministerio de Fomento, Javier Martín, e o director xeral de IGVS, Heriberto García Porto.
O obxectivo do Circuíto ANERR, impulsado pola Asociación Nacional de Empresas de Rehabilitación e Reforma, é cumprir coas expectativas de información e profesionalización que o sector, a cidadanía e as administracións públicas demandan para achegar a cultura da rehabilitación dunha maneira clara, eficiente e práctica.
Na súa intervención, o edil asegurou que a rehabilitación “é para este Goberno municipal un piar fundamental da política urbanística que queremos impulsar, polo tanto, a rehabilitación da cidade construída é a ponte entre o urbanismo e a mobilidade, as dúas áreas fundamentais desta concellería”. Outro motivo do seu valor engadido é “a súa capacidade xeradora de gran cantidade de postos de
Nota de Prensa
traballo cualificado”, ademais de ser sustentable, xa que “prima o mantemento fronte á demolición e á nova construción, mellorando o medio ambiente da cidade”. “O fomento do emprego e a sustentabilidade do sistema produtivo son claves do crecemento económico que desexa o Goberno local”, explicou.
O concelleiro tamén recordou que no Pleno que tivo lugar onte no concello tivo lugar a aprobación inicial da Ordenanza reguladora da concesión de axudas para a conservación e rehabilitación de edificios de vivendas que simplificará o procedemento da ordenanza que está en vigor desde 2006 en canto á ordenación dos documentos e a tramitación de solicitudes. A nova norma implicará, ademais, unha mellora nas contías das subvencións e na definición técnica e orzamentaria destas actuacións.
