Coas obras crearase unha nova planta en altura no edificio, que será empregada como almacén con vistas a que nun futuro albergue outros usos de carácter público.
A Deputación da Coruña financiará, a través do Plan Único (POS+2019), a creación dunha nova planta en altura da Casa da Cultura de Brens, no Concello de Cee. As actuacións tamén permitirán mellorar o illamento térmico do edificio.
As obras, actualmente en período de licitación na Plataforma e Contratación do Estado, suporán un investimento de 158.839 euros.
A superficie desta nova planta empregarase como almacén e estará conectada ao salón de actos, que está na primeira planta xa existente, a través dunhas escaleiras que tamén se construirán dentro desta reforma e que chegarán ata o recibidor da planta baixa do edificio.
O novo espazo ten previsto albergar usos públicos nun futuro, polo que tamén quedará previsto un lugar para a instalación dun ascensor para facelo completamente accesible a todas as persoas.
Ademais da construción desta nova planta, as reformas incluirán a mellora do illamento térmico exterior, colocación de novas fiestras na zona ampliada e instalación de ventás e porta no salón de actos actual.
As obras teñen un prazo de execución de 6 meses.
