O Concello pon en marcha o primeiro aparcadoiro de motos cuberto da cidade

O novo equipamento sitúase na estación de autobuses e responde á filosofía do PMUS de fomentar os medios alternativos ao turismo
O Concello coruñés, a través da área de Mobilidade que dirixeBegoña Freire, informa da instalación do primeiro aparcadoiro para motos cuberto da cidade, dentro da política de fomento do uso da motocicleta do Plan de Mobilidade Urbana Sostible (PMUS). Así, no marco de actuacións propostas polo PMUS da Coruña, proponse a implementación de actuacións dirixidas ao uso de motocicletas e ciclomotores coas que atender axeitadamente o incremento que se rexistrou (son máis de 13.000 unidades, o que representa o 10% do parque total de vehículos motorizados).
Así, o primeiro estacionamento para motos cuberto da cidade sitúase na zona destinada a aparcadoiro na estación de autobuses. O proxecto inclúe, noutras actuacións, a execución dunha estrutura de aceiro de singular deseño, cunha superficie de 30 m2 e con capacidade para entre 9 e 12 motocicletas ou ciclomotores. Conta con cuberta de chapa do mesmo material e caneiro conectado á rede de augas pluviais. Ademais inclúese a dotación de elementos que impidan que outros vehículos se aproximen ao aparca-motos, evitando que se produzan danos e creando un espazo de seguridade perimetral; á vez que se atende unha demanda dun colectivo que require a utilización dun equipamento persoal específico e, polo tanto, dun espazo cómodo, seguro e cuberto.
Esta iniciativa, que ten un presuposto total de 16.827 euros, tamén inclúe outros aparcadoiros de motos e elementos de protección asociados en distintos puntos da cidade; e terá continuidade coa execución de novos aparcadoiros cubertos, como o que se proxecta en Pugna e Parga baixo o viaduto de Alfonso Molina, co que o incremento total de prazas realizado neste mandato será do 90% (un 60% en 2014 e un 30% en 2015), alcanzando así as 537 prazas.
As novas situacións sitúanse preferentemente antes dos pasos de peóns, de forma que se facilita o seu uso e elimina a barreira visual que ás veces provocan os vehículos, mellorando tamén a seguridade vial de condutores e peóns. Ademais, puxéronse en marcha outras medidas, como a redución de pinturas viais nos pasos de peóns para evitar a derrapaxe dos vehículos de dúas rodas ou a eliminación de guardarraís inseguros para os motoristas, así como a reparación das tapas de sumidoiro da calzada.
O Goberno local continúa coa súa aposta decidida polo fomento dos medios alternativos ao turismo e, en especial, polas motocicletas, xa que nos últimos anos se duplicou o seu uso dada a súa axilidade e economía, contribuíndo, ademais, a liberar espazo da calzada da cidade. A súa utilización caracterízase polo seu menor tempo nos desprazamentos, menos pegada ecolóxica e menor custo, converténdose nunha opción real para a mobilidade diaria.